講下所謂「儒表法裡」

越來越相信「儒表法裡」嘅見解係腐儒諗出嚟嘅嘢。

莫講最出名嘅係荀子教出咗韓非李斯等等學生，原來吳起都係子夏嘅弟子，而吳起嘅變法，大概係商秧秦變法嘅初模。

儒家嘅經典都有講：「禮不下庶人，刑不上大夫」。本身古中國社會分貴族平民階級，孔子不斷講禮講君子，係教人點樣做貴族。佢冇詳細講平民係點樣管治，但如果君子治禮，咁平民就梗係用刑。

戰國時，戰亂頻繁、大夫弒君又成日發生，國家生存嘅方法就係削弱貴族、加強君主對人民直接管治，提升管治效益。同平民講「禮」係晒鳩氣嘅，所以儒生由講「禮」，遙身一變做咗「法家」講刑法、講賞罰。其中理念其實同孔子一樣，君君、臣臣、父父、子子，只不過當時亂世冇資源做普及教育，嚴刑苛法就係特效藥。

順帶一提，「法」好用之處就係中央政府變成一個 “programmer”，喺國家機器裡面實踐程式。呢種玩法，比起古代以習俗為本嘅禮儀，功效真係差天共地。可以話，春秋時代之前，中原基本上冇所謂諸候間嘅惡性競爭；而戰國時期，唔做「制度現化改革」嘅國家就好快滅亡。

理論係從歷史事實中汲取教訓嘅。

三家分晉、田氏篡齊 -> 君主要緊握實權，削弱貴族勢力，否則會亡國 -> 唔用貴族，可以用有才能嘅平民代替

戰爭越嚟越激烈，並且開始唔講道理 -> 軍隊現代化，唔可以單靠貴族打仗(cf. 曹劌論戰之「肉食者謀之，又何間焉」)，而係要由國家指派嘅將領直接號令由平民組成嘅軍隊。做法就係賞軍功。越打得就越高爵位，呢樣嘢同時削弱貴族嘅權力。

但係要賞軍功、出軍餉，點俾得起錢呢？所以國家內政嘅效率都要提升，所有地方嘅稅收都交由中央管理，減少貴族食邑。

咁中央官員又點樣管理咁多人民呢？點樣保證官員做嘢妥當呢？邊度搵咁多政治人才去管理國家呢？唔緊要，只要有一班主腦寫法律，地方官照住執行就得，唔使要叻，只要識文書會計就夠。所有嘢規範化、規模化，就可以自動運作，唔使用個人德行去馴服手下嘅貴族一層一層咁疊落去，少咗中間人，提升咗效率、甚至有咗 economy of scale，咁國家就現代化咗。

而去到最後，班知識份子就諗，社會最大問題就係各國之間不斷戰爭，咁有咩好得過最強國家統一全國，咁就永遠唔會有再有戰亂，所有嘢都跟住法制自動波運行，天下從始就太平喇。

秦始皇夠擔用數字去編排皇帝，認為自己朝代可以千秋萬載，自信可能就係喺呢度嚟。

咁當然，既然當時嘅法律係寫 “program” 俾國家機器去 run，最後問題梗係啲 program 有 bug。以前秦始皇以為抑壓貴族就可以防止變亂，點知國家崩壞係由平民作反開始，而平民作反原因就係啲法律有 bug，迫平民做啲佢哋做唔到嘅嘢，搞到佢哋無可退要作反。

呢個完全係鐵達尼號規模嘅失敗，戰國時期嘅「儒法混合思想家」將所有國家衰亡嘅 scenario 都諗過晒，點知衰在 program 有 bug (初階programmer係唔信自己有咁多bug架)，衰在平民作反(史無前例)。所以與其話秦亡係因為嚴刑苛法，我覺得更加貼切嘅講法係「秦帝國 1.0」個 release 太急，未 fix 晒啲 bug 就推出 production，搞到世紀大爆炸。

漢初承秦法，蕭何政府幫手fix下啲bug，高祖又將啲蘇州市外判咗俾人 (漢初封王，景帝時先收返)，唔知所謂黃老術係咩嚟啦，或者就係 if it aint broke don’t fix it 嘅 friend。

去到武帝時，尊儒術，其實就係恢復返秦帝國模式，i.e. 「秦帝國 2.0」。當然儒家都分流派嘅，正如現代都有左翼右翼。後來左膠集團掌權，王莽玩咗一輪「新」嘢之後炒晒粉，俾人 revert 返去漢朝模式，漢朝前前後後都成功 run 咗幾百年，喺當時嚟講真係非常唔話得。

所以中華帝國嘅模型嘅脈絡都幾清晰，所謂「儒法」之別真係好似左派右派嘅分別咁。後代儒家將啲「衰嘢」賴晒落商申韓等「法家」人物身上，似乎唔多公平。事實上，禮同法嘅分別真係在於規模。一個幾十人、幾百人嘅集團，當然用「禮」去治；去到千萬之眾，要達到同樣效果就要用刑法。我諗你讀 MBA 都係教呢啲，幾時用 incentives，幾時用 leadership/inspire the team，要小心 incentives 有 bug 搞到 counterproductive 之類。(利申冇上過business course) 當然啦，一開始搞平民向上流嘅人就係孔夫子，咩「有教無類」，教出咗一班有能力代替貴族幫國君治民嘅新士人階級，unlock 咗連鎖效應，變相日後國君借呢班从嘅力量大力壓抑貴族，推動變法。所以中華帝國始祖都係非孔夫子莫屬。

去到後來唐宋科舉取士，士大夫階級全部變成儒生，整個孔子 vision 真係幾乎成真，真係難怪佢二千幾年盛享大名，連咩康德康有為都打佢唔冧。連啲咩習近平思想都係偷佢橋，現代中國都係靠佢崛起，如果中國喺廿一世紀繼續強大落去，或者總有一日孔夫子嘅功勞會被世界共認都唔定𠻹。