解香港人堅持悼念「六四」？

諗咗咁多年，我終於明白點解香港人會堅持悼念「六四」。

「六四」事件主要發生於 1989 年嘅北京，本身同香港冇直接關係。當然，事件牽涉中共派系鬥爭，當年以趙紫陽為首嘅自由派被打倒，對中共對港政策影響都頗大。

不過自「六四」之後，香港都曾經發生過唔少大型社會抗爭事件，直接影響香港政治前景，點解「六四」三十年前發生喺北京，而 03 年反廿三條遊行、 14 年雨傘佔領，時間比較近、比較「在地」嘅事，反而冇咁多人「悼念」呢？

我諗咗好多年，發現個答案真係好低 B。其實一句咁簡單：就係「六四」死過人，而香港近年嘅政治運動冇直接死過人。

某程度上柴玲講得好啱，「六四」要流血[1]。死過人同冇死人嘅震憾性係唔同嘅。正如我一直話齋，#犧牲就係意義。注入人命嘅運動，比起滴血不流嘅運動，有更大嘅份量、重量。兩者俾到人嘅震憾，係天同地嘅分別。

我哋記得「六四」，係因為當年有無數嘅人，自己嘅信念而犧牲。姑勿論你認唔認同佢哋嘅理念，都必須承認佢哋係真心相信自己嘅理念，並且唔係為一己之私行事。反觀喺香港，事無大小嘅政治運動，都會有人質疑係有人「收咗錢」做嘢，陰謀論不斷。根本原因，係因為喺香港搞政治運動風險相對低，曝光率高，為求利益者眾，而且未死過人，大家都唔當係一回事。

喺香港人嘅 living memory 裡面，有好多人為自由民主犧牲嘅事件，大概就只有「六四」。喺香港和理非嘅政治運動裡面，既然只有投機主義者而冇犧牲者，群眾就只可以將願景投放於遙遠北方嘅運動。香港本土嘅政治係投機嘅、係污糟嘅、係不可信嘅，只有當年神州北方嘅學生先至係聖潔無暇。香港本土無此產物，唯有從外地輸入。就好似食物同食水咁，一切都可謂係全球一體化供求經濟學之下必然發生嘅結果。

大家唔好以為我講埋呢啲嘢係想叫人去死去犧牲。我自己近年越嚟越驚死，各位大大高抬貴手呀。今日有位教中學歷史科嘅師兄喺臉書寫道：「記得歴史事件是死的，但人物，特別是寂寂無名的小人物，曾是生的。」 有時我哋活在和平安穩嘅年代，好容易將書本上嘅腥風血雨當成小說裡面嘅虛擬嘅故仔。我萬萬唔願意見到香港人要為政治而死，但正因為我哋絕大部份人咁錫身，所以讀歷史嘅時候要更加謙遜，知道自己只係膽小鬼一名，唔好以為自己係咩大人物，可以隨便左右到歷史變遷。

— —

[1] 傳聞佢係被 quote out of context 嘅，不過嗰句喺三十年後睇返，始終冇錯。