究竟華為產品有冇後門(backdoor)？

電訊科技咁發達，而家每部「智能」電子產品都有億億聲嘅晶體、背後由百萬以至千萬行程式碼所驅動。咁複雜嘅系統，點會冇bug？點會冇保安漏洞？

有時保安研究員會發現新嘅保安漏洞，嚴重嘅話，入侵者可以隨時 hack 入啲做足保安措施嘅系統。廿年前，啲人會貪玩攞嚟整啲無聊電腦病毒，最壞都係刪除人哋電腦嘅資料。不過由於呢十幾廿年所有嘢都電子化，被人 hack 嘅後果就嚴重好多。最少，黑客都可以將你嘅資料加密然後迫你用 bitcoin 解鎖。

不過搞咁多嘢，都唔一定賺到錢。[1] 真係要賺不義之財，又點止係勒索 bitcoin 咁簡單？試下擴闊想像，諗下如果 hack 到入任何人嘅電腦或手機，可以做到啲乜？可以得到有幾大「價值」嘅資訊？商業機密？軍事機密？習近平嘅黑材料？又或者喺特定時候癱瘓某啲關鍵嘅系統？

如果係謂 “white hat” 發現保安漏洞，佢哋通常會即時通知負責開發系統嘅公司，等佢有時間補救：整 patch，通知所有受影響嘅人 upgrade，然後世界繼續順利運作。和平真好。

但唔係所有保安研究員都咁「好死」。

呢啲漏洞係有人出價去買嘅。據聞價值不菲[2]。仲有，呢啲保安漏洞好難翻用，因為一旦被發現，負責開發系統嘅公司通常會好快修補咗佢。究竟咩人先俾得起上百萬美金買保安漏洞，淨係用一次呢？就算係 IQ 高達 160 嘅讀者，應該都唔會諗到太多可能性 :) （話時話，有興趣聽多啲故仔嘅人，不妨查下 “Stuxnet” 呢個名[3]。）

言歸正傳，究竟華為產品有冇後門？如果問嘅係有冇「特登加落去嘅後門」，當然冇人知，甚至華為老闆任正非都未必知道。但呢個問題係煙幕嚟。真正要問嘅問題係：究竟華為產品有冇保安漏洞？各國嘅國安部門有冇能力利用呢啲保安漏洞達成佢哋嘅目的？

我完全唔知華為嘅產品係點運作，裡面係點整，但係我都可以肯定咁答：一定有好多漏洞，有足夠財力嘅國安部門一定可以爆破佢嘅保安。

唔單止係華為產品，基本上所有現代電子系統都一定有漏洞，hack 唔 hack 到就只係錢嘅問題。

任正非不斷重申「華為設備冇後門」，可能佢係講真話都唔定。不過有關係架咩？喺有足夠資源嘅國安部門眼中，所有現代電子產品都係中門大開，任人窺視、操緃。如果本身冇後門，都可以用保安漏洞整個出嚟。如果唔夠漏洞，都唔使特登加架，請多幾條廢柴整多啲bug落去就已經得。

當然啦，如果開發產品嘅公司喺自己國家，好多嘢做起上嚟都方便啲，呢個就一定冇錯。

⋯⋯

題外話講多兩句，而家電腦保安嘅 state of art 真係一日千里。平日 IT9 話科技太快「追唔切」，通常都係佢哋自己唔肯學新嘢就喺度呻。但而家啲保安漏洞真係防不勝防，如果你要 100% 安全，噉你嘅「敵人」係擁有接近無限資源嘅各大國嘅國安部門。佢哋可以用錄音將你嘅密碼偷走[4]，又可以用影像「偷聽」到你講嘢 [5]。我今日先知道，原來普通 wifi 係點 set 都有漏洞，除非你用嘅系統喺一年之內買嘅[6]。都仲未講舊年風靡全球嘅 “spectre” 同 “meltdown” 硬件漏洞，而家有人話佢係基本上冇藥醫 [7]。

正常人可以做啲乜？諗下有冇人願意俾幾百萬美金 hack 自己。冇？ 咁都只可以照樣生活，work eat shit sleep。至於咩記住裝 antivirus，喺今時今日，同醫生叫你食維他命 C 一樣咁有用。(按：未必冇用架，不過睇下你面對嘅係咩菌啦)

— —

以下嘅連結係我亂咁喺搜尋器打關鍵字搵出嚟嘅。大部份喺寫呢篇文之前都冇睇過。

最後利申多句：以上內容只係作者個人意見，同任何其他人都無關。