揚咗就冇得掹

名星戴綠帽，點解咁多人追住食花生，可能純粹係因為呢啲事情「痛得嚟有喜感，遙遠得嚟又有共鳴」。正所謂「三人行必有綠帽，總有一頂喺左近」(我鳩作嘅)，有返咁上下經歷嘅人，總會試過一兩次頭上綠油油。就算你係究極絕緣體，你都總會有一兩個朋友同你呻過。

喺網絡上，唔會有人公然話伴侶「出軌」冇咩大不了。只要涉及一個「綠」字，網絡規矩始終係要上綱上線，將事情查個水落石出，將狗男女拖出公海處決先肯罷休。

但喺日常生活裡面，通常就冇咁多「公義」可言。派帽嘅人可以逍遙快活，一啲後果都冇；戴帽者亦都可能係當冇事發生，默默承受一切。網上豪言狗男女殺個片甲不留，網下現實可能係戴帽者為咗「愛情」或者咩原因都好，願意當冇事發生，甚至主動囈對方回心轉意。

咁當然好多「衛道之士」會話「一次不忠」乜乜柒柒 — — which is perfectly fine, btw。社會倫常係咁，亦係現代西方文明嘅基石嚟，主流社會有咁嘅諗法一啲都冇問題。所以，好多人私下冇底線噉包容伴侶，但就算佢哋幾抵得諗，都唔會想周圍張揚。

因為，揚咗就冇得掹。

只要其他人得知你伴侶「出軌」，就自然會有人「戥」你唔抵，幫你做一大堆嘢去尋找「公義」。（用得個「公」字梗係大眾利益凌駕個人感受架啦。）而如果你又冇七情上臉咬牙切齒或一哭二鬧三上吊，就會繼而俾人質疑你究竟係咪對段感情認真。就算你思想幾「開放」都好，就算你本身係幾平常心面對都好，都總會有人撩返件事出嚟講，不斷俾壓力你表態。唔通你喺公海講句「其實冇咩大不了，識得返屋企就夠」？或者講句「其實我係地底泥，點樣踐踏都唔會反抗」？最慘係你其實已經好難受，只係想將過去嘅事放低，但又被迫不斷重覆經歷返嗰件事。咁點可能放低重新出發？

好多愛情寓言故事講就理直氣壯，實踐起嚟就變晒樣。正如你屋企嘅賓賓唔會變咗灰姑娘，一般人嘅愛情經歷亦都唔會係「邂逅=>相愛=>結婚=>永遠幸福」咁簡單。或者好多人試過被背叛，但你又有冇試過被背叛之後，你愛/痴情/痴線到願意原諒佢一切嘅過失？我覺得，未試過願意無條件咁原諒伴侶嘅人，其實未嘗試過真正(i.e. “real life”)嘅愛情。（「願意做」唔係「值得做」，「值得做」又唔係「應該做」，咪搞亂）

盡量對身邊嘅人好，係應份嘅事嚟。但人唔係完美嘅，人亦都唔係有百份百自由意志嘅，大大小小嘅過失，有啲係無傷大雅，有啲係罪無可恕。但每個人把尺都唔一樣，尤其係感情呢啲咁個人嘅事，更加可以係好主觀。只要唔係「有傷風化」(i.e. 離經叛道而又大肆張揚)，其實就即同 LGBTQ 所謂「我閂埋房門做乜關你X事」嘅道理一樣。

愛情最難能可貴之處，係雙方都曾經做過一啲「罪無可恕」嘅事，但最後大家都願意放低過去，相信將來會美好。或者「仆街獲得幸福結局」真係應該落地獄，但老老實實，只要人嘅關係有咗得失計較嘅觀念，就已經唔係「愛」，而係「交易」。所以連登仔話個個都係雞，所有爭執都係勞資糾紛，其實都錯唔晒。現代愛情公式其實就係男女交易參考價目：人情就八百、結婚就要買樓、住私樓有雞髀食、好老公最少月入三萬⋯⋯ 而所謂「綠帽要除得快」其實同「有樓就有高潮」係同一類嘢嚟，都係有訂立標準、教化萬民嘅功用。

不過呢啲係咪愛情？愛條毛咩。