「老母」唔係粗口！

唔知點解啲媒體將「老母」寫成「老X」並且消埋音。

「老母」自古以來都係正經、文雅嘅中文嚟。例如《史記》管晏例傳：「鮑叔不以我怯，知我有老母也。」《戰國策》齊策：「孟嘗君問：『馮公有親乎？』對曰：『有老母。』」 古籍裡面大把，我都係隨便 search 下都有無數個 result，絕對唔係生辟用法。

咁廣東話裡面嘅「老母」係咪一定要有個「屌」字先算係粗口或不雅呢？咁又唔係。例如以下對話：

甲：「有咩嘢唔妥，咪慢慢講囉！」 乙：「講佢老母呀講！」

仲有喜記老闆經典對白：

「邊有錢呀，你老母！」

上面嘅用法絕對唔係文雅嘅用法。

我覺得，「老母」之前係要加「你」或「佢」先算係粗俗。如果冇咗呢兩個 keyword 就唔應該當做粗口。

當然啦，「母親」呢個概念之所以被污名化，香港政府官員都功不可沒嘅。幾年前有曾偉雄「慈母」論，早幾日有林鄭嘅「嚴母」論，都係將偉大嘅母愛貶抑成政權打壓市民嘅藉口。

要為母愛平反，首先就唔應該將個「母」字當粗口。要消音，點解唔可以變成「X母」呢？ 又或者潔癖啲嘅，直頭變「XX」以示公平？