Moore’s Law 垂危，經濟仲靠咩持續增長落去？

今日睇新聞，Intel 被傳又搞唔掂個 10nm process [1]，雖然官方即刻否認[2]，但難免令我諗返起我兩年前發嘅噏風[3]，關於硬件樽頸位對大圍(唔係沙田嗰個)經濟嘅影響。雖則話其他 foundry 嘅 10nm[4] 同 7nm[5] process 進度貌似良好 [6]，但睇返大勢，好多人都話 Moore’s Law[7] 未必有好多年剩 [8]。

Moore’s Law 垂危，又唔代表啲電子嘢冇進步嘅空間 [9]。不過，我就比較悲觀。如果要我斷估，硬件會越嚟越專門化，去迎合唔同範疇嘅需要，喺嗰啲專門範疇之內，硬件嘅進步仲有唔少空間。但係，整體嚟講呢啲進步係咪可以好似以前咁樣以幾何級速度發展呢？我就唔多睇好嘞。

眾所周知，幾何級嘅經濟增長係現代社會嘅靈丹妙藥。貧富懸殊、資金唔夠、借錢還唔到等等嘅問題，通通搞掂晒。而近十幾廿年全球嘅經濟增長，其實好大程度受惠於 Moore’s Law [10]。睇返今日全球市值最高嘅上市公司，十間有七間係科技公司。相反，好多曾經紅透一時嘅產業，就有衰落之勢。當一個行業唔再係 leading edge，就會有人頂爛市。例如汽車生產咁，除非你好似 Tesla 咁樣整新類型嘅車，否則就算你係業內龍頭大佬，都難免會漸漸被邊緣化。所謂「創業難，守業更難」大概就係呢個道理。

「英雄造時勢」固然冇錯，但另一邊廂，除非你係可以憑一人之力改編歷史嘅頂尖人物，否則，時勢亦都會係你成敗嘅關鍵。呢個世界係好殘酷嘅。如果你搞嘅係最尖端嘅科技，你嘅競爭對手就係當下你嘅競爭對手，而且你嘅對手可能好少。 但如果你身處一個好成熟嘅行業，呢個行業已經有幾十年甚至幾百年歷史，你嘅競爭對手除咗當下嘅人，仲有行內嘅前輩，亦有其他嘗試用新科技取代你行業嘅人。喺成熟嘅行業裡面，你要突圍而出，唔單止要叻過今日嘅人，仲要叻過晒之前嘅人，仲要受得起新時代、新技術帶嚟嘅挑戰。要做到呢個地步，其實真係好難。

當然，「創新」都唔易。香港人近年又興返講「創新」，但好多人唔明白，所謂「創新」唔單止係有新思維、新諗法，而係需要投入時間、金錢、聲譽落去呢啲新思維度，去做啲前人未做過嘅嘢。當中所需嘅眼光、勇氣同熱誠，喺香港人當中比較少見。

但就算你要創新、創業，都要有門路先得。千禧之後嘅科技公司，好多都係靠網絡起家，其中一個好大因素係因為入場費低。呢個都係受惠於時勢。十幾年前，開源軟件開始成熟，「雲端」基建開始成形，真係萬事俱備只欠東風。網絡 startup 之風由此起，跟住一個大致類同嘅劇本 [11]，征服咗好多唔同嘅市場，對經濟、對大眾嘅生活都造成深遠嘅影響 [12]。

睇返科技發展嘅脈絡，好多時係一樣嘢掕[13]另一樣嘢，一步接一步砌出嚟。例如發明咗蒸氣機，然後先可以有火車，然後先可以有鐵路系統，然後鐵路系統再影響經濟結構，再為世界帶嚟巨大嘅變化。喺 21 世紀，電子產業嘅發展，令到雲端技術、智能手機等等嘅技術變得可能，然後其他創業家先至可以講「創新」，發展成今日嘅巨型科技公司雄霸天下嘅世界。

我哋今日話 Moore’s Law 可能行將就木，但其實 Moore’s Law 由 Gordon Moore 喺 1965 年提出到今日已經應驗咗超過 50 年。如果歷史有如果，如果 Moore’s Law 去到第 30 年，即係 90 年代嘅時候，就停止咗，咁會點呢？ 科技倒退 20 年，我哋可能仍然有得「寬頻」上網 (即係快過 56K 少少嗰種)，但就應該唔會有智能手機。可能仍然會有社交網絡，但未必會有臉書，可能會比較似高登討論區咁樣 （係，起碼會好似佢咁慢）。Instagram 呢類圖片分享嘅功能為主嘅社交網絡就更加冇咩可能，想像下 90 年代嘅電腦點可能即時幫你處理幾 MB 嘅圖？片就更加唔好諗。其實 Google 呢類 search engine 係咪可以咁有效，都好成疑問 (不過網絡上又會相對少好多內容，可能打和啦)。就係咁樣，今日嘅十大市值上市公司，隨時都唔見咗幾間。由此可見，Moore’s Law 嘅持續，對世界各國 GDP 嘅影響，對人類生活嘅影響，可以好大。

或者有人會話，就算冇咗 Moore’s Law，一樣有其他創新嘅嘢推動經濟啫！ 係，呢啲係樂觀諗法。 或者有人心諗，如果咁易俾你估到將來會點，你一早就發咗達啦！ 係呀，都啱架。（我呢度講嘅嘢九成都係馬後炮） 不過其實，睇返當年 2000 年所謂科網股泡沫，再睇返今日科技股大行其道，究竟係當年嘅人一窩蜂炒燶咗科技股，定係其實佢哋先至係有先見之明，一早睇到電子科技同互聯網嘅潛力？納斯達克指數呢幾年蒸蒸日上，大大抛離道指，某程度係印證返當年投機者嘅理論：資訊時代即將降臨，網絡公司潛力巨大，機不可失。（當然，今日成功嘅科技公司，同當年被炒到天價嘅公司，就未必係同一堆⋯）

今時今日，喺 2018 年，或者我孤陋寡聞，感受唔到市場有呢種對新科技嘅殷切期盼。吹咗好多年嘅能源、生物科技，究竟係咪有料到，真係唔知。或者會有啲新突破，而新突破或者會對某幾間公司嘅股價有利。但呢啲技術係咪可以好似蒸氣機、好似電子晶片咁樣，推動一個時代嘅發展呢？我就真係唔識睇嘞。

大家放心，呢啲講緊係十幾年後，甚至幾十年後先至會變得真切嘅問題。而家就算 Moore’s Law 已死，仲有大把地方可以應用現有嘅科技去創新，去發展。（例如人工智能，應該都仲起碼玩得十年八載…） 但之後會點呢？ 冇咗呢啲推動世界經濟發展嘅科技突破，究竟世界會變成點呢？呢個先至係最有趣嘅問題。 究竟資本主義會唔會破產？ 究竟我哋會唔會搵到「經濟增長」以外嘅方法去解決社會問題？ 究竟「創業家」係咪會變成夕陽工業呢？ 當社會只能抱殘守缺嘅時候，究竟人類嘅信念同價值觀會起啲咩變化呢？ 呢啲問題，我都好想每樣 9up 少少，不過範圍太廣闊，好多人就呢啲問題寫過專題文章，出過書，我就暫時唔講住喇。我諗個重點係，呢啲問題其實好複雜，亦都好難用今時今日嘅思維去分析。我哋可能需要新嘅思維、新嘅哲學、新嘅價值觀[14]去迎接呢個新時代。或者「創業家」會變成夕陽行業，但照咁睇，或者「哲學家」呢個古老（並好似已式微）嘅「行業」，就嚟會再起舉足輕重嘅作用[15]。

（我覺得，如果今日識得答呢啲問題，就會好似喺 2000 年買入 MSFT 咁樣，等 18 年之後，終於等到股價回升，計埋通漲之後都算係回到本，證明自己當年其實係冇睇錯架，只不過世人愚昧，唔識貨之嘛。）

— — — — — — - — — — — — — -

（原文於 2018 年 10 月發佈，略有修輯）