網絡有好多種玩法，不過唔係每種都啱小朋友自己採用。

例如話，做廣告嘅梗係想多人睇多人俾反應，最終目的係賣多啲產品，增加收入。

但走去講時事政治嗰啲究竟係想達到咩目的，我成日好懷疑。好多人已經講過，社交網絡係迴音谷，但呢個唔係我想探討嘅。問題係，如果想持續多人睇多人俾反應，就要迎合觀眾口味。商業嘢就梗係冇問題，𠱁得掂啲客，有錢落袋，大家開心。但政治節目、媒體、專欄等等，雖則話唔少收費，但其實佢哋主要唔係賺錢嘅工具，而係俾啲所謂「KOL」嘅人發表下意見，好似有啲社會影響力咁。

但喺呢種情況下去迎合觀眾口味，其實即係製造迴音谷。谷內嘅音響越大，谷主自以為越成功，越有影響力，越係有精闢嘅論述。但其實呢啲嘢啱得越多人口味，純粹即係你嘅見識同一般群眾一樣，甚至係你俾群眾嘅意見牽著走。本身 KOL 好似係解 “Key Opinion Leader” ，係可以推動群眾想法；但如果做政治論述都要擔心讀者或觀眾人點諗，咁其實可謂 “Key Opinion Indicator”，縮寫成「KOI」[1]。

本身諗住做 Leader 變咗做 Indicator，最慘係好多人唔覺。

喺網絡之前，傳統媒體有個好處，就係由少數人壟斷咗資訊嘅供應。例如話，如果你喺大台鳩噏幾句，咁就算你講嘅嘢未必係好主流嘅見解，你嗰幾句說話都一定有好大嘅影響力，因為觀眾冇咩得揀，局睇局聽。呢啲情況下就真係可以 “lead” 到輿論。有咗網絡之後，傳統媒體嘅影響力下降，無數嘅迴音谷相繼形成，聲勢越大越響嘅，反而越可能係 “indicator” 而唔係 “leader”。

所以諗住推動社會改變嘅，如果去睇like數去迎合觀眾，咁你只不過係被社會改變 [2]。所以，如果想推動社會改變，正確方法其實係唔理人點諗，總之就係講真心話。

社交網絡嘅好處係，就算你冇傳統媒體嘅認可，一樣可以發表 9up，而且好彩嘅話或者仲可以 reach 到一啲有相似諗法嘅人。呢樣嘢喺幾十年前好難發生。或者會有人問：「咁咪即係迴音谷囉！」 如果你係迎合讀者觀眾，咁梗係變迴音谷。但如果只講真心話[3]，咁總會有啲嘢係同平時嘅觀眾有分歧[4]，咁佢一係唔再睇你啲嘢，迴音谷唔成形；一係就可以有新觀念嘅衝突，咁自然唔係咩迴音谷。

呢啲交流其實先至係社交網絡最有用之處，唔係用嚟大規模傳播意識形態[5]，而係用嚟小規模撒播一啲或者有可能唔知幾時會有啲用嘅種籽，並且俾佢哋一個小小嘅成長空間。好多論述今時今日冇用，唔代表日後冇。只要啲嘢留咗底，喺網絡度搵得返、查得到，咁日後或者有可能唔知幾時成為後人推動社會嘅基礎。

至於妄想用網絡本身去推動社會變革嘅人，咪妄想嘞。網絡唯一可以做嘅只係溝通平台，可以俾群眾一個方去去協調，卻係冇可能𠱁得到啲人做啲佢本身唔想做嘅嘢。喺網上嗌到聲嘶力歇，聲音最多都只會 reach 迴音谷嘅邊緣。

— -

（原文於 2018 年 12 月發佈，略有修輯）