泛民之死 II

時代會變，社會亦會變。

唔識得自我革新嘅組織，自然會被時代革走。唔想被歷史洪流沖走，就要識得變化、革新、改進。

一講到改變，好多人就開始不安。我哋係咪要放棄固有嘅原則、價值，去迎合新嘅環境？如果所有價值觀都可以改變，咁我哋究竟堅持緊啲乜嘢？ 好多人唔識答呢啲問題，所以佢哋懼怕改變。如果往日堅持嘅價值原來隨時可以變，咁當年咁辛苦堅持又係為咗啲乜？

去到呢個位，就應該問下自己，究竟有冇啲乜嘢係不可動搖嘅根本價值 — — 就算冒住被時代革走嘅風險，就算冒住犧犧時間金錢性命都在所不計 — — 究竟有冇一樣咁嘅嘢？

「我份人好有原則」聽落似係好嘢嚟，所以好多人以為，原則越多越好。但其實，單係守護一個「原則」已經好難。你願唔願意為呢個「原則」付出一切？如果唔願意，咁嗰啲根本唔係你嘅原則，只不過係因時制宜嘅習慣而已。

有咗呢個比其他一切更重要嘅原則，組織就可以革新，可以改進。只要唔違反原則，全部都可以做；只要可以向理想邁進一步嘅嘢，全部都應該做。

太多嘅所謂原則，太多嘅所謂底線，喺平時只會阻礙自己嘅步伐，但去到關鍵時候，卻每每係守不住呢啲原則同底線。舉個例，甲某聲稱自己嘅原則係唔向其他人借錢。所以佢出街帶唔夠錢嘅時候，寧願周圍搵 ATM 撳錢，都唔肯向朋友暫借一兩百蚊。後來，佢為咗結婚，向銀行借咗五百萬買樓。

所以，真正嘅原則唔係冇事冇幹嗰陣拎嚟擺下姿勢嘅嘢，而係重大關頭嘅時候，你點樣取捨。政棍點解為之政棍，就係因為佢哋口頭講好多原則好多底線，但臨到危難關頭，卻係因為有難言之隱所以未能夠堅持，叫大家同情地理解佢嘅情況。

所以講原則，究竟你係真正咁相信，定係葉公好龍，呢樣要問清楚。好多嘢係魚與熊掌不可兼得，去到被迫取捨嘅時候，先會知道邊樣最重要。

所以，一個組織，只要有一個永遠唔變嘅大原則就好夠。其他嘅嘢，必須因應時勢作出適當嘅判斷。 中國共產黨可能係中國史上最識得自我革新嘅組織。喺幾十年之間，由大鑊飯轉型成為市場經濟，或者大家喺資本主義社會長大唔覺有咩咁出奇，但一個掛住「共產」名義嘅組織可以作出呢種深刻嘅路線調整，其實係好唔容易嘅事。同中共打對台嘅組織，你哋究竟自己有冇呢種自我改革嘅能力？ （至於爭論究竟抗爭可否爆粗同動粗嘅人，哈哈，哈哈。）

回顧泛民嘅墮落，可以話佢哋係唔識得革新改進以適應新時代嘅挑戰。「食六四老本食足三十年」呢類批評已經係耳熟能詳，唔需多講。照計泛民本身都知道自身有問題，但點解明知衝緊向懸崖都收唔到掣呢？我認為根本原因，係因為泛民之間冇一個「核心價值」。歸根究底，泛民唔似係一群以價值同理想維繫嘅勢力，反而似係靠個人關係而形成嘅「幫派」。呢個幫派當然有佢自己嘅「隱語」。例如「爭取民主」、「反建制」、「平反六四」呢啲全部都係用嚟分辨某某係咪「自己人」。呢啲說話同行動冇必然嘅關係，所以有人同中聯辦密商，有人喺 DQ 後話選舉係「自由選舉」，有人喺黨內專政，全部都唔係問題。最緊要得到「大佬」認證係「自己人」就得，所以「泛民唯一代表」係一錘定音嘅，邊個係「自己人」邊個唔係「自己人」，從來唔係靠理念同行動去分辨，而係靠幫派嘅大佬自己「說了算」。

只要組織唔係奉某個「價值」為最大原則，咁就無從討論究竟一項改變，對組織係好定壞。「同中聯辦密斟」係好定壞呢？大佬說了算。新移民應該攞幾多福利呢？又係大佬說了算。一班自稱「爭取民主」嘅人，連選民都可以鬧，可見根本冇任何理性嘅論點可以令佢哋改變主意。順帶一提，中共係有佢嘅核心價值嘅。「不惜一切繼續做執政黨」係中共嘅核心價值，而泛民連呢樣嘢都冇，所以長毛可以喺臉書屌票，就係因為佢係 其中一員「大佬」。

有咗一啲「核心價值」，就算係最低地位嘅成員，都可以提出質疑。只要說服到其他人呢啲嘢影響組織嘅核心價值，整個組織就有理由去跟進，去改善，甚至革走一啲侵害核心價值嘅人，無論佢地位幾崇高都革得走，因為核心價值永遠高於任個個人。

呢啲先至係組織嘅生存之道。

睇香港大勢，泛民將亡，有志另起爐灶嘅人，唔可以唔知組織應該點樣運作同管治。核心價值要先於領導者。點解話「ideas are bulletproof」就係因為信念同理想可以超越個人嘅存亡。而一個運行得有效嘅組織，係將呢啲信念同理想發揚光大嘅良好載體。

（原文於 2018 年 11 月發佈，略有修輯）