泛民之死

有民主，邊個唔想要吖？ 本身泛民主派號稱為香港爭取民主，應該會得到大部份香港人支持先啱。

咁點解咁多人支持建制派呢？

一般泛民論述就會話係「蛇齋餅糭」，或者選民「被蒙蔽」、「冷漠」，甚至係「冇良心」。但如果你認真理解一下建制派支持者點樣睇泛民，你會發現佢哋比你想像中更加「關心政治」，亦唔係「反民主」，只不過佢哋係認為，民主派嘅人「搞事」、「為反而反」、「做戲」、「呃人」。

香港人可能係全世界最鍾意講政治嘅民族。呢幾十年嚟，你估淨係得「本土派」睇穿泛民淨係識呃票同屌票咩？好多人俾面你，先唔喺你面前將李柱銘一直鬧到去黃浩銘咋。好多喺泛民口中「未被教化」嘅選民，仲精過你啦，十幾廿年前已經知道泛民主派嘅劣行，不過你俾肥佬黎洗咗腦，死都唔信咋嘛。

以前科技冇咁發達，如果你淨係肯睇《蘋果日報》，你當然唔會知道泛民人物劣績班班。民主派係唔會犯錯嘅，任何人批評佢哋，佢哋就會有班人咬返你轉頭。當青政都曾經被被當成中共奸細嘅時候，當馮檢基都會俾蘋果老屈同中共打交道嘅時候，你可想而知，呢幾十年嚟無辜被屈係親中親共嘅泛民批評者有幾多。你既然唔信呢啲「中共奸細」對泛民嘅批評，咁泛民主派梗係聖潔無瑕，一啲問題都冇，最衰都係共產黨抺黑。

不過，紙係包唔住火嘅，當本土派已經從行動中證明自己唔係「中共奸細」，泛民嘅瘡疤越揭就越多。《蘋果日報》已經唔係宇宙唯一「良心」報章，喺網絡消息流通嘅世界裡面，邊個係神係鬼一個 click 就無所遁形。

或者而家仲會有人哀悼「泛民之死」，話晒佢哋都呃咗大家幾十年，呃開有感情，斯德哥爾摩症候群乜乜乜。但其實，你而家發現呢啲事實，先至係真正嘅「覺醒」。恭喜你，你哋終於覺醒喇。往後嘅路仲好長。與其為一樣本身唔存在嘅幻像而傷心，不過大家一齊諗下點樣行落去好過啦。

（原文於 2018 年 11 月發佈，略有修輯）