最文明嘅屌票，最聰明地含L

單議席單票制。

假設選民當中，有 40% 係 A派支持者，45% 係 B派支持者，15% 係 C派支持者。A 派平日同 C派明爭暗鬥，甚至有時連同 B 派打壓 C 派。A 派立場同 C 派有相近之處。選舉嘅時候，A 派打手不斷咁話：你一定要投我，否則 B 派就贏架喇！

嗱，做啲咁仆街嘅嘢都算。最神奇嘅係，如果 C 派選民唔肯投 A 派，A 派嘅打手就會將失敗歸疚於 C 派選民嘅「不合作」。當然 A 派嘅關公做得唔差，抛出好多名堂例如「聰明選民」、「策略性投票」等等。

喺我眼中，呢啲講法只不過係比較高階嘅「屌票」行為，即係話你 C 派選民「蠢」、「好蠢」同「好撚蠢」。講真，IQ 唔過 100 嘅選民，最好唔好投票啦，否則 B 派就會贏架喇，係咪咁講先？

我唔知 A 派閂埋門圍爐討論嗰陣，屌自己友嘅聲音會唔會響得過屌選民嘅聲音。喺單議席單票制嘅選舉中，政客如果支持率唔過半又想贏，係要聯合其他派別，成立一個 coalition，加埋有 50+% 支持率，大家傾好點樣分餅仔，然後一齊支持其中一個參選人。

如果呢個 coalition 唔夠大，將某些關鍵少數派別排除在外，咁輸咗都係抵死嘅。如果你係A派，見到有啲隊友，平日同啲潛在盟友結怨，做啲自尋死路嘅嘢，係咪應該屌先？點都抵屌過選民啦係咪？ 一邊將其他派別排除在外，同時又想佢哋支持者撐自己，呢啲真係有違「政治倫理」，同揸住支鎗搶嘢冇分別。

我想講，連呢啲嘢都唔明白嘅政客同埋幫佢哋屌票嘅所謂 KOL，真係連政治101都未識，學人講策略講點樣「聰明」玩選舉遊戲，真係唔驚俾人恥笑架咩？

政治咁樣玩法，點可能唔死。喺我眼中，嗰啲人真係好蠢、好撚蠢呀。

#A派先至係焦土派呀

作者按： 「L」 係「淚」

（原文於 2018 年 3 月發佈，略有修輯）