搞世代鬥爭最抵玩

今日香港社會似乎以年齡分咗階級，我樂觀其成。一般嚟講，一個健康嘅社會，係要多元、包容、要團結向外，唔應該內部分裂。不過，事情總有例外嘅。「世代鬥爭」雖然會撕裂社會，但呢種撕裂只係暫時性嘅。長遠嚟講，一定係後生嘅得到勝利。正所謂「消滅唔到對方就唯有包容」，如果明知對方會早過你死，咁包容就唔係必須。時間一到，反對者自然死亡，社會自然回復團結，當初嘅堅持同付出，會收得豐盛嘅成果。

用廢青打廢老嘅戰略，同毛主席當年用嘅策略同出一轍。毛主席當年太進取，弄巧反拙，但其實本身條橋係唔錯嘅。

一個社會，如果分咗做唔同嘅族群，互相攻伐，就會出現嚴重內耗，難以健康發展。

所以一個健康嘅社會，必須要有啲大部份人都認同嘅基本價值。呢啲價值喺每個社會都唔同，但一定要有。或者，你可以叫呢啲價值做「核心價值」。

如果社會冇一啲大家都認可嘅基本、核心價值，就會出現所謂嘅「社會撕裂」。喺呢個殘酷嘅世界，一個群體如果唔自強，就會被外人利用、分化，去達到一啲不利本土嘅目的。所以，為咗維護本土利益，「自己人」一定要團結向外，否則就只有死路一條。

咩係「自己人」呢？ 正如仆擇話齋：「定義『自己』好難」。敵我之分，就在於「自己」嘅定義。

傳統嚟講，香港政治分界線，叫做「建制／泛民」。喺坊間輿論，兩者係水火不容，冇妥協嘅餘地。呢種情況，某些人稱之為「社會撕裂」。

如果香港社會太平盛世，其實撕唔撕裂又唔係好大問題。不過近年香港發生咗唔少大事，我總係覺得如果香港人肯團結向外，事情嘅結果或者會好唔同。 #愛就係選擇，#選擇就係捨棄，喺力量不足嘅情況下，堅持最重要嘅原則，捨棄次要嘅原則，先至係生存之道。喺咁嘅情況下，為咗啲唔太緊要嘅原則而加深呢啲「撕裂」其實唔太好。

解決「撕裂」嘅方法得嗰幾種，一係和平分手，各不相干；一係消滅對方；一係包容。

喺香港，幾百萬人生活喺同一個細小嘅地方，冇咩可能畫條界線搞一港兩制，建制派住喺呢區，泛民主派住喺另一區，所以「和平分手，各不相干」係唔可行嘅；喺香港殺人放火係犯法嘅，建制派唔可以用武力殺晒泛民，反之亦然，所以「消滅對方」亦都唔可行。

所以就唯有包容嘞。

包容，只係認清現實，未必係捨棄原則。現實係對方活生生存在，而你冇辦法改變佢嘅思想行為，就算你點樣鬧佢恥笑佢都冇用架，又唔可以殺晒佢哋，咁唯有包容。

喺呢個包容嘅大原則下，可以睇下大家之間其實有冇共同嘅價值或目標。未必有，但唔排除冇。坊間講到啲人，如果政治立場相左，就一定水火不容，或者妖魔化對方，咁其實好無謂。現實啲講，如果你消滅唔到對方，而又要成日對住佢哋，最好都係客氣啲。

要貫徹自己嘅原則，要實踐自己嘅理念，最重要唔係口頭嘅決心，而嘅係你要得到相應嘅力量去消滅同你相左嘅勢力。

我總覺得呢啲嘢係常識嚟，唔知點解好似要寫幾百字去講啲咁小學雞嘅嘢。

至於「世代鬥爭」呢種「撕裂」點解冇咁大鑊，主要係因為過多幾十年就乜事都冇吖嘛。包容就要妥協，唔想妥協咁多就要將某一群人排除在外。我本來想講，搵啲廢老開刀，過多幾十年就冇後果，換來嘅係可以減少包容幅度，增加堅持價值嘅範圍，好似幾抵玩咁解啫。不過點知好多人連基本常識都冇，講咩後生仔女都好多【對立政見】嘅人。屌，只要你認佢哋係「香港人」，佢哋咩政見都要包容架啦，尤其係如果佢哋有權有勢，更加唔可以隨便得罪呀。屌人之前睇下自己咩料先屌，消減唔到又避唔開對方就千祈唔好同人開拖。就係咁~

（原文於 2018 年 2 月發佈，略有修輯）