唔好叫我「老師」

我對俾人叫做「#老師」有莫名嘅恐懼。

今時今日，老師係一種專業。讀過教育文憑，受過專業訓練嘅老師，尚且未必掌握教育學生嘅方法，一個普通人又有咩資格擔此重任呢？ 一諗起對後進影向之深遠，我就好擔心自己學識不足，耐性唔夠，只會誤人子弟，所以我好怕教人嘢。起碼我係咁諗。

自孔夫子以來，傳統上老師係一種 father figure。又唔知幾時開始，「君臣父子」之後儼然多咗「師徒」一倫，老師變成一種權威嘅象徵，不容挑戰。我諗呢種咁父權嘅觀念唔係傳統嚟，不過我已經唔識考究係幾時開始嘅事，或者係呢一百幾十年啩。

所謂「聞道有先後，術業有專攻」，人係冇可能樣樣專通嘅。有啲嘢我叻啲，有啲嘢你叻啲，大家平等交流，冇咩必要動輒叫「老師」。孔子曰「三人行必有我師」，連萬世師表都可以周圍向人學習，我就唔明點解咁多人安然被稱呼做「老師」。唔係話做咗「老師」就一定唔可以學習，但接受咗呢種稱呼之後，其他人未必願意向你說教，學問嘅交流難免漸趨單向，咁就唔多抵。

我係市儈嘅，大家平輩論交，甚至我認下契弟，就可以學多啲嘢，係好爽皮嘅事。臉書嘅世界好有趣，雖然盲毛係甚多，但不時都會有啲奇能異士，真係網絡之間必有我師焉。聖人無常師，所以大家真係唔好隨便叫人老師，除非你真係同佢有師生之實，或者存心靠害。

諗咗一排寫唔寫呢樣嘢好，寫出嚟又會俾人以為我單打陳老師，或者俾啲正牌教育工作者對號入座以為我講佢哋。其實我係講緊一種風氣，an unhealthy wind，思想嘅毒瘤，一種存在於大家心中嘅 virus。

（原文於 2018 年 9月發佈，略有修輯）