你每花一分鐘去學一樣嘢，人生就少咗六十秒去學其他嘢

有個問題困擾咗我好耐。我唔明點解好多人都會覺得自己熟悉嗰範學問好有用，覺得應該人人都要學，甚至人人都應該要識嗰啲嘢。

我就覺得，一個人對住自己範疇嘅學問十幾廿年，或者真係有啲心得。但係用十幾廿年先學識「咁少」嘢，而嗰啲嘢又唔見得有好多實際用途，照計應該係覺得時間付出多，收獲少，會有種「隔籬飯香」嘅感慨先正常。

但事實上就係，好多人似乎完全唔識得從其他人角度去睇嘢，真心覺得後生仔女花多啲時間學自己嗰範嘢就會好（似自己咁）叻叻，真係好難理解。難道佢哋唔知道每花一分鐘去學某樣嘢，人生就少咗六十秒去學其他嘢咩？難道佢哋唔知道自己當年沉迷學某樣嘢嘅時候，捨棄咗無數其他嘅機會？

學問或技能，真係要好鍾意先至好瞓身落去，因為嗰啲知識係用生命換取嘅。但唔瞓身又唔得喎，因為一個人成長嘅時候如果冇返一兩樣特別拿手嘅技能，喺現代資本主義社會只會淪為一個可有可無嘅勞動機器。

另外就係好多時啲人推廣某範疇嘅學問嗰陣，會話你學咗之後除咗識多咗嘢之外仲會培養ABC能力、訓練XYZ思維。好多時嗰啲嘢真係 9up 嘅，同打籃球可以令你高啲一樣。 正所謂人蠢冇藥醫，如果學識一樣嘢可以令人全面地聰明咗或叻咗，都真係幾勁。相比之下可能風水佬啲嘢仲可信少少，我覺得。

其實喺學業同工作以外學嘅嘢，都係興趣嚟架啦。#愛就係選擇，我就覺得冇話咩邊樣嘢或邊範比較高尚。鍾意學嘢嘅人，悶悶地就會自然咁搵啲嘢出嚟學下或者玩下，唔鍾意學嘢嘅人，同佢講咩道理都冇用。所以呢，有時都唔明點解啲人咁執著。

其他人都唔識，先顯得你勁架嘛。（好似係

（原文於 2018 年 1 月發佈，略有修輯）