KFC 「豬柳強」食評

今朝八點開會，早咗幾個字到公司，決定喺附近買個早餐食。

我係麥記豬柳強嘅愛好者，忽然諗起 KFC 出咗個新包，叫做「豬柳芝蛋包」，擺明抄豬柳強，就心郁郁想去試。嗱，其實我對 KFC 包係冇期望嘅，一早都估佢難食（老師又中！），但基於「#自由意志就係開心食屎」嘅原則，我毅然走入一間 KFC，叫咗呢個「豬柳芝蛋包」餐。

其實我嗌嘅係「A1 餐，飲熱奶茶」，不過服務員姐姐（應該係該店經理？）就向廚房嗌咗聲「豬柳蛋」。睇嚟個「芝」字只係用嚟避諱而已。話咁快，個包就整好喇。

呢個「豬柳芝蛋」包嘅外表尚算正路。可能 KFC 冇老麥嘅煎蛋器具，所以隻蛋唔係整整齊齊圓餅狀，而係有啲碎碎地好似用鑊嚟煎咁樣。（見上圖）

我咬落去，果然有驚喜。「驚」嘅係個 muffin 竟然可以咁難食。麥記豬柳強個包係輕微烘過，剛剛整好應該係熱熱地，幾香脆嘅。佢個包冇烘過之餘，味道仲唔太新鮮，好似擺咗兩三日咁；「喜」嘅係隻蛋竟然係有少少流心嘅（見圖），相反麥記豬柳強係響應政府呼籲，係煮到熟透嘅。不過呢個「荷包蛋」拯救唔到個包變成劣食，除咗個 muffin 難食之外，塊豬柳同芝士都係淡而無味，一路食只係感受到個 muffin 就嚟過期，都係飲返啖奶茶沖淡個味。

我個人對劣食嘅包容程度好高嘅，話咁快就食晒成個包，十分鐘都唔洗。而家過咗大半日，都冇肚痾，證明啲食物仲係安全嘅，大家如果想實踐自由意志的話，不妨試下 KFC 呢個新包吖。

不過我就唔會再試架喇 :)

（原文於 2017 年 6 月發佈，略有修輯）

後記：太無聊喇，啲圖唔抄喇，請自行想像。