Don’t Starve 玩後感

最近發現咗一隻 game 叫《Don’t Starve》，算係一個 survival game，你喺遊戲入面控制一個角色，要喺充滿怪物嘅荒野求生。隻 game 嘅其中一個特點係冇得 save/load，角色死咗就會被刪除，永遠都用唔返。

玩咗幾日之後忽然萌生一個感想：人對於死亡嘅恐懼，除咗係生物嘅求生本能，係咪仲因為投放咗太多時間落呢個「角色」度呢？ 人越老似乎就越唔想死，大概真係對咗自己幾十年日久生情，越嚟越唔願放手。

但就算人唔死，都會不斷改變，冇得 load 返之前個 save game 再嚟過。十年後嘅自己，必然同今日嘅自己好大分別。某程度上我哋每一刻都有部份嘅自己死亡，同時每一刻都孕育新嘅自己。

今時今日醫學、科技倡明，人均壽命增加，好多人都可以活到七老八十。一個人由孩童去到立身成名，通常需要三四十年。但人到中年，之後仲有三四十年先會終壽，期間社會又變，自己又變，固難以 save 低當年嘅風光。

有時同朋友傾開，或者喺網上見人感嘆，覺得好多曾經仰慕嘅長輩，臨老卻係如是不堪。前車可鑑，但唔知鑑完之後有冇用。畢竟好多響噹噹嘅人物，佢哋必然克服咗好多挫折、面對過好多質疑，然後佢哋覺得只要腰骨一挺捱過去就成功。呢啲人一定有強烈嘅自信，亦唔會重視一般人嘅批評，行之有效幾十年，確然好易到老年時諗埋一邊，繼續唔理人嘅批評。

成功嘅要素變成墮落嘅根源。所以人要死亡。一個人就算唔死，佢過得幾十年，都會變到同之前完全唔同。就算佢人冇變，社會都會變，社會對佢嘅評價都會變。我哋總有個錯覺，覺得萬物有其「本質」、「靈魂」所在。不過變幻先至係永恒，所有嘢都會變。

所以呢，無論咩人都好，為咗自己心理平衡，要不斷提醒自己雖然係世界嘅中心，但都不過係短暫一刻嘅過眼雲煙；每一刻自己所做嘅嘢必然賦有最大意義，但下一秒已經未必如是。或者我平時講開嘅「謙遜」唔係對於宇宙嘅廣闊而感到嘅卑微，而係面對時間嘅沖洗，我真係乜嘢都唔係。

（原文於 2017 年 12 月發佈，略有修輯）