點解香港人成日鬧天文台錯誤預報天氣？

俗語有云：「天有不測之風雲，人有旦夕之禍福」。古往今來，天氣本身就係一種難以準確預測嘅嘢嚟。就算今時今日技術進步咗，超級電腦都唔可以解決蝴蝶效應嘅問題。細微至一隻蝴蝶拍翼帶動出嘅氣流變化，可以引起幾星期後嘅一場大風暴，你除非係上帝，否則如何預測？

所以，就算氣象技術點進步都好，天氣預測都必然帶住幾分不確定。就算天文台嘅預測有 99% 準確都冇用，因為嗰 1% 始終係會發生 （並且平均三個幾月發生一次），如果你完全依賴天文台嘅預測，就好容易因為預測出錯而令自己大失預算。

但好多香港人唔係咁諗。香港人無止境地追求「安穩」，並且要求社會提供「安穩」嘅環境，去到一個幾近不合理嘅地步。呢個正正係香港最嚴重嘅風土病。好多人對未來嘅「不確定」有莫名嘅恐懼。好多香港人一生所追求，正正就係所謂「安穩」。但安穩係咪真係大家所想咁好嘅嘢嚟呢？ 我成日同人講，唔好害怕未來嘅不確定性。因為如果未來真係完全確定，咁人生就會好似一個一早寫好劇嘅劇本，你只可以跟足劇本照做，冇自由，冇決策權，更加冇希望。

「希望」係咩嚟？希望源於未來嘅不可知。假如我哋真係剔除咗未來嘅不確定性，世界的確唔會變得更壞，但亦都唔會變得更好。我唔係一個樂觀主義者，我絕對清楚未來變壞嘅機會唔細得過變好嘅機會。但大家唔好唔記得古語有云：「The only thing certain in life is death.」 大家一出世，人生就充滿不確定性，只有死亡係肯定嘅。最安穩嘅人生其實必然係死寂嘅，最簡單就係立即自殺，或者成世坐監都好安穩；但大部份人都會寧願自由地活多一日，去感受明天嘅不確定性。

我自己本人就好少理天文台講乜嘅。因為測不準嘅嘢，你信佢幾多成都死，所以不如唔理佢嘅預測，隨機應變。只要有變通嘅能力，無論未來嘅預測錯得幾離譜，都冇有怕，唔使姓賴，將自己嘅失敗，歸疚於一個冇可能嘅任務：預測未來。

講返轉頭，所謂「天有不測之風雲，人有旦夕之禍福」，當中唔單止有「禍」，原來仲有「福」。點解六合彩攪珠冇得預測結果？其實都同「蝴蝶效應」有關。明明係同一隻蝴蝶，天文台測唔到佢就鬧爆，但晚晚就求神拜佛想要中六合彩頭獎，咁樣唔係一件好可笑嘅事嚟咩？

（原文於 2017 年 6 月發佈，略有修輯）