青少年自殺率因政治氣候而高咗？

【以下內容或會引起觀眾反感，敬請留意。】深夜人少少，又鳩噏下。

話說近年好興話社會乜乜柒柒，搞到啲青少年自殺。但望返數字，又唔覺得係多咗。

一個人(成功哋)自殺，通常都唔只係單一原因，而係多種因素促成。啲新聞報道就好鍾意用「某某疑因XXYYZZ，在家中吊頸自殺」呢種筆法，但通常 XXYYZZ 真係唔係足以令人自殺嘅嘢嚟，例如「學業問題」、「感情問題」等等。

個人經驗話我知，一個人要死，除咗決心之外，仲要「克服」天生嘅求生欲，先可以自殺成功。呢個世上大把人有好多理由生活得唔開心，甚至係生不如死，但由於未能超越到自己嘅求生機制，想死都死唔去。又有若干嘅人，客觀條件唔算特別差，但係都會覺得生無可戀，最後甚至走上自殺呢條不歸路。我成日同啲 suicidal 嘅人講：「要死唔易架。」唔係涼薄，佢哋都知架，唔係就一早死咗啦。其實好多人都知，如果自殺咁易實行，就唔使討論「安樂死」呢啲嘢啦。

一個社會、一個世代，對未來失去希望，大概的確會令人有種「不如死咗去算」嘅感受。但呢啲感受會否真係轉化成自殺率，望住啲數字真係咩都睇唔出。

從一種「文宣」嘅角度，將自殺嘅新聞 spin 為對社會某些不公義嘅控訴大概無可厚非，但有識之士一查就睇穿嘅把戲，如果講得太多吹得太誇張，無疑係磨蝕自己嘅公信力。如果係有意為之，尚且算係 calculated risk，但如果連自己都真心信埋啲未有足夠證據嘅嘢，喺其他人眼中柒咗但自己又唔知，咁就唔多好。

我反而想知道有冇 suicide attempt 嘅數字。總覺得 attempt

嘅數字，可能會對社會問題比較 sensitive 一啲。另一種解讀，就係近年嘅自殺率比「沙士」時期低，或者社會實際情況真係冇輿論所講咁差。如果真係咁，過份悲秋傷春嘅論述，脫離現實，難以發揮效用，就應該調整。

講完一大輪，其實都唔知自己有冇查漏嘢。始終唔係話隨便 Google 睇咗第一頁結果就會變成專家。但我認為唔少人見話多咗青少年自殺，首先係吃驚，然後就會隨手上網查一查，發現又好似冇多到咁樣。如果呢樣嘢真係有數據支持，不妨得閒多啲拎出嚟講下，否則一個七百幾萬人嘅城市，隔幾日有人自殺真係好「正常」嘅事嚟，冇得用「你睇？又死一個喇」嚟論證任何嘢。

（原文於 2017 年 12 月發佈，略有修輯）