關於Java嘅迷思

一般上咗年紀嘅人對 Java 嘅認知，大概停留於 90 年代末嘅 Java Applet。當時嘅 Java Applet 通常啟動得好慢，又核核突突，唔係太受歡迎，所以後來慢慢被 Javascript 淘汰。（順帶一提，Javascript 同 Java 就好似鯨魚同魚咁樣，係兩樣幾唔同嘅嘢嚟，唔好撈亂呀。）

好多喺 90 年代末至 21 世紀初接觸電腦科技嘅人，對 Java 嘅觀感特別差。當時嘅 Java 行得好慢，功能又唔齊，setup 又麻鬼煩，真係見到都唔開胃。

Java 嘅問題不止於此。Java 係出名「又長又唚」嘅程式語言。人哋寫兩三行就搞掂嘅嘢，喺 Java 可能要寫幾十行。好多程式員對呢樣嘢非常反感。如果有得揀，好多人會選擇用返啲冇咁長氣嘅語言。

不過，雖然 Java 咁多問題，但係呢十幾年以嚟，Java 喺後端 (backend) 技術嘅發展非常蓬勃。點解呢？ Java 嘅啟動速度仍然係有啲慢[1]，但喺後端伺服器環境裡面，大部份嘅 process 都係一直長開唔會停嘅，所以啟動時間冇太大關係。而 JIT [2] 技術進步咗，電腦又快咗，今時今日 Java 喺大部份情況下已經唔算慢。

Java 而家喺伺服器嘅後端大行其道[4]，其中一個原因，其實係贏在起跑線。雖然 Java 語言本身非常唔討好，但佢有一個非常龐大嘅 standard library，好多常用嘅功能已經包埋俾你，唔需要程式員自己寫，省時省力。呢個完全係「父幹」嘅問題，Java 係由一間大企業[3]控制嘅語言，有錢就可以請多啲人將個 standard library 寫得勁啲。今時今日，好多新嘅語言都有好可觀嘅 standard library，但 Java 應該係第一個附送咁大規模嘅 standard library 嘅語言嚟。

由於贏在起跑線嘅關係，就算 Java 個語言本身(曾經)幾令人討厭，好多企業為咗節省開發資源都照樣用 Java，貪佢有好多現成嘅功能，唔使再寫多次嘛。正值呢個時期開源軟件興起，好多人繼續為 Java 寫開源軟件，Java 就有更多嘅現成軟件可以用，揀用 Java 嘅企業又再節省更多開發嘅資源。呢樣嘢先至係 Java 最煞食之處，呢種優勢係大部份其他程式語言難以突破。[5]

所以好多時，大企業做大型嘅軟件項目，Java 會係數一數二嘅選項。唔係貪佢有咩特別，純粹係慳人力、慳錢。相反，小型軟件項目就比較少會用 Java，因為⋯⋯ Java 真係(曾經)幾乞人憎囉。就算近年 Java 追返某些功能，好多開發人員都覺得 Java 太「悶」，不及其他新潮語言咁「好玩」。

至於某套軟件系統應該用咩語言或平台去寫，真係好睇個系統用嚟做乜、有冇咩特別要求。呢類問題屬於「軟件架構 (software architecture)」範疇，呢啲決定對項目嘅 budget、對系統嘅性能、對系統嘅長期維修等等都有深遠嘅影響，所以通常留返俾有咁上下軟件開發經驗嘅人去拍板。 雖然我本人好討厭排資論輩，但呢類決定的確係需要由資深嘅人去做。好多經驗比較淺嘅人，揀技術平台會傾向投入太多個人情感，亦會傾向用啲比較「型」嘅技術，忽略好多長遠問題。

至於近日民航處爆出嚟嘅花生，大家睇到佢哋嘅系統問題多多，但除非真係睇晒佢哋嘅系統架構、規格、要求等等嘅文件，否則真係好難評論實情「錯」在何處。未得到足夠資料就 jump to conclusions 嘅人，絕對未夠資格去設計任何大型軟件項目嘅架構。

我哋行內流行講 Murphy’s Law，大意就係「任何可以出事嘅嘢最終都會出事」，即係話，就算有樣嘢 99% 肯定，剩低嗰 1% 都唔可以忽視。不過正所謂「隔行如隔山」，做軟件工程需要嚴謹，但係做網絡評論員（或者而家興叫做「KOL」）卻係的確唔需要咁認真。我之前都講過，反正媒體公信力失效，倒不如開放空間俾大家鳩噏，唔好太認真。所以，如果用軟件工程要求嘅嚴謹尺度去批判網絡 KOL 的確唔係好公平，反正香港有言論自由，大家都有自由發表自己意見，何必認真呢？

— –

（原文於 2017 年 6 月發佈，略有修輯）