自動化機械令大量人口失業，人類何去何從？

當自動化機械取代人類嘅經濟產能，令大量人口失業，人類何去何從？

我相信呢個問題，就快就會變得迫切。有人話，自從工業革命之後，機械取代人力勞動嘅例子多不勝數，今一輪嘅發展又可以有咩特別呢？分別就在於，人工智能終於去到一個真係開始取代人類智能嘅地步。以前機械取代嘅只係「機械式」嘅粗重工作，市場上仍然對細緻工藝、對需要用腦嘅工作有好大嘅需求。

不過近呢幾年嘅科技發展，似乎會令到機械可以取代埋呢啲工作。由貨車司機到審核文件嘅律師，無一幸免。唔係話機械會統治世界，不過失業率應該會越嚟越高，因為機械可以取代人類嘅職能越嚟越廣泛。

喺「傳統」(?)嘅經濟學分析，失業率越高，代表經濟越差。社會上有一大班人搵唔到工，代表嘅係經濟結構出咗問題。但係，如果呢種失業率係因為產能過剩，大部份人唔使工作都可以有基本嘅溫飽，咁樣算係經濟好定差呢？

假設喺呢個「後稀缺」嘅年代，搵唔到工嘅人唔會被當成浪費地球資源俾人捉去人道毀滅，咁剩餘嘅勞動力，又可以做啲乜？

呢個問題真係唔易答，因為其實係古今第一哲學問題嚟。如果人唔需要為兩餐溫飽勞動，咁人生嘅意義係咩呢？有咩值得去做呢？ 資本主義提供咗一個答案：你賺越多錢，代表你對人類社會嘅貢獻越高。某程度上，呢種評價人嘅方法係最量化最客觀嘅，只不過當絕大部份工作都被機械取代嘅時候，我哋係咪要接受，搵唔到工作嘅人、比唔上機械嘅人，全部都係垃圾？

我哋睇返以前嘅偉大思想家、哲學家，絕大部份都唔係鼓吹賺錢為上。人類本身識得分辯善惡，只不過喺近呢幾百年資本主義嘅影響之下，善惡同富貧嘅觀念似乎融為一體咁解。我相信，喺一個「後稀缺」嘅年代，人類終於有機會喺享受現代資本社會嘅物質財富嘅同時，又有得追求一啲以前資本主義社會所唔容許（即係賺唔到錢）嘅主觀價值。

只要你有啲賺唔到錢都願意去做嘅嘢，咁你喺呢個「後稀缺」嘅年代，應該仲會搵到人生嘅意義。唔好以為「唔使做」真係咁正。好多人退休之後，正正係因為「唔使做」，所以變成「冇嘢好做」，頓失人生意義，悶出病。

近年中國經濟發展一日千里，好多中國人都因此自我感覺良好。觀乎世界諸國，最願意將「錢」放在第一位嘅，大概非中國人莫屬。眼中只有錢嘅國民，面對住即將來臨翻天覆地嘅變化，究竟會唔會炒車炒到上外太空呢？或者過多幾十年，俾人恥笑「無謂嘅堅持」、「有錢都唔賺」、「理想唔可以當飯食」嘅人，反而會變得最高尚。

（原文於 2017 年 11 月發佈，略有修輯）