粵港澳叫「大灣區」就想做「矽谷」？你冇病呀？

見到有傳媒報道[1]，李家傑話「粵港澳大灣區」會變成中國嘅「矽谷」。真係要慨嘆一句：無知真係幸福呀~（即係：唔撚係呀！？你有冇見過 Steve Jobs 架？ 乜楊局長冇教精你咩？ 乜你咁易俾人老點嘅？）

住喺「矽谷」嘅人通常唔會用「矽谷」呢個名，一般就咁叫「(San Francisco) Bay Area」，中文譯做「灣區」。唔通有個天才，以為將粵港澳統稱為「大灣區」，就真係可以做到「灣區」，做到「矽谷」？？？咁叫「阿發」嘅人係咪一定會發達？哈哈，呢個笑話好唔好笑呢？

香港人成日以為要發展經濟，發展產業，一定需要大量投資同基建。但如果你去過「矽谷」就知道，嗰度啲基建真係世界級咁差。公共交通係幾乎唔存在嘅，去偏遠少少嘅地方收唔到電話，上網又貴又唔方便，方圓幾十公里都搵唔到一棟高過五層嘅樓，加州州政府長年赤字，都唔理得咁多。

「矽谷」之所以成為科技公司嘅集中地，純粹係一場意外，唔係黨同國家指使嘅。

幾十之前，其實冇人預料過電腦電子科技可以發展得咁勁。想賺錢嘅人，去晒紐約炒股票，做 banker，做律師，只有廢青 hippies 先會喺 San Francisco 度啪嘢自 high。幾十年前嘅灣區主要係種果樹嘅，所謂「矽谷」只不過係一小撮人為興趣而自己組成嘅小公司、小學會。

嗰度嘅高科技文化，係咁多年嚟，經歷好多巧合而慢慢累積出嚟嘅。你以為搞科技講「創新」？其實創新係需要技術同文化傳承，慢慢醞釀嘅，從來都冇得「一步到位」。就算政府億億聲咁搞基建，最多都係搞掂「硬件」，而我哋都清楚睇到，其實基建對於「矽谷」係可有可無。但文化、技術、人才呢啲「軟件」係可遇不可求，絕對唔係錢可以買到嘅。

成功需要天時地利人和，咁啱呢十幾年科技發展得快，「矽谷」嘅人才、公司、技術就即刻升值百倍。佢哋「成功」背後，係靠之前幾十年嘅醞釀。如果等到熱潮高峰你先開始去追，你已經輸在起跑線喇。

如果問「矽谷」有咩特別之處，大概係少咗東岸嗰種「國際金融大都會」嘅感覺。加州除咗 LA 之外，人口密度好低。有加州陽光照耀、太平洋海風吹拂，冇咗東岸大城市嗰種壓迫感。啲人少啲急功近利，少啲銅臭，少啲講究法律同規矩，多啲追求「無謂」嘅理想同夢想。

對於科技公司，夢想係好重要嘅。研發一樣新嘅嘢，由「冇」變「有」嘅過程，靠嘅就係呢種想象力。有夢想，先至可以面對失敗而唔放棄。否則，急功近利嘅人，必定會選擇走捷徑，不外乎玩財技、cut cost、或為其他短期利益犧牲長遠發展。正正係因為太多人選擇立即 cash out 眼前嘅利益，所以一直堅持理想嘅人先咁罕有。物以罕為貴，所以少數成功嘅追夢者先至有得發達。

我唔係話每個人追夢都會發達。大部份都唔會。但如果一個地方嘅文化鼓勵最叻嘅人去追夢，咁又唔同講法。夢想唔係一個人去追，而係需要有社會文化嘅支撐，亦都需要一定嘅自由空間。如果你問我，「矽谷」今日嘅成就，如果唔係因為歷史嘅偶然，就係因為當地嘅文化有種浪漫色彩，有幾分反叛，幾分不正經。

我意思係，「矽谷」嘅成功，係因為佢哋同香港人完全相反。

香港人口密集，上流社會嘅人滿身銅臭、急功近利，政府破滅無數夢想，以法律束縛任何新嘅嘗試，同時毀滅舊傳統。香港除咗有個珠江三角「灣」之外，究竟仲有啲咩同「矽谷」相似？我真係睇唔到。唔講香港，就算係廣東省各個城市，都唔好得幾多。

據講李家傑話唔可以學「梁蘇記」咁講人情味，否則就會被淘汰。如果佢真係講過啲咁 on9 嘅嘢，咁佢一定未去過「矽谷」。佢肯定唔知三藩市作為「矽谷」嘅一部份，（曾經）係一個幾咁有人情味、幾咁放蕩不羈嘅城市。冷酷無情嘅商業世界係冇可能孕育創新架，淘汰咗人情味，冷冰冰嘅產品又點可能觸及人心，霸佔市場？ 大佬，創新唔係起樓呀。

想發達，就必須帶領潮流，而唔係不斷窮追其他人嘅後塵。科網嘅市場，過多十年八載就已經係水尾。到時又會有新嘅技術，新嘅產品，新嘅市場。偉大嘅中國共產黨搞「大灣區」基建，搞得嚟都起碼三五七年。到時硬件俱備，但又冇相應嘅人才配合，缺乏起碼十幾廿年嘅技術同文化傳承，到最後咪又變返一堆地產項目。將數碼港做大做闊做多，哈哈哈。

計我話，趁住科網熱潮仲未out，快啲跟住啲師奶叔伯一齊買騰訊，都好過投資粵港澳大灣區嘅新「矽谷」呀。

[1] 好神奇，《852 郵報》 http://www.post852.com/?p=232609 話係轉述《星島日報》嘅報道，但我又搵唔到星島有提呢件事。再者，網上搵關於「粵港澳大灣區矽谷」嘅新聞，卻見到星島日報隔一排就吹幾嘴。究竟搞乜鬼？

（原文於 2017 年 10 月發佈，略有修輯）