用嚟實踐嘅論述

解構咗泛民嗰啲廢弱論述之後，就要構築返一套香港民主嘅理論。

呢下先至係堅難。

好多人以為論述只係文宣一部份，用嚟氹人入局。唔係架。理論係用嚟實踐嘅。表裡一致，符合事實嘅論述，實行起嚟係順暢嘅，力量可以相輔相成；自相矛盾，天馬行空嘅論述，實行起嚟就會唔協調，力量互相抵消。例如今日叫你支持 X，聽日叫你反對 X，大家落晒力去撐完 X 再去反 X，力量抵消，呢啲就係自相矛盾嘅問題。

好多人以為，講咁多嘢做乜吖，做嗰陣先傾都未遲。但其實唔係架。你去旅行就可以一路行一路計劃行程，但如果帶住七百萬人去旅行，你唔一早諗定點行，真係會喺沙漠魂遊四十年架。大型社會只有兩種協調嘅模式，一就係有個人(或相對細嘅組織)獨裁行事，所有嘢都經佢決定；另一種就係靠共同理念支撐，大家跟同一套理念去行事，只要理念係清晰一致嘅，無論邊個做決定都唔會得出太大差別。除此之外，冇任何一種有效協調機制。如果單靠「民主」，真係唔夠架，因為民主協商程序係緩慢嘅，只可以作為一種調整機制，而唔足以協調社會日常幾百萬樣嘢。民主社會同一時間只會討論幾個大議題，其他嘢就係靠大家之前積落嘅慣例去處理。嗰啲慣例，其實背後都係隱藏住某一套哲學，體現嗰個社會某種理念或精神。如果政策之間冇一個宏觀嘅理念，好容易就會出現政策之間嘅矛盾，力量抵消，減低社會運作嘅效率。

所以，理論係要實踐嘅。

好多人到今時今日，以為搞政治就係鳩嗌口號。「打倒共產黨！」嗌得好響亮，哈哈哈。不過，如果真係俾你奪權，你會點樣改革香港嘅制度？ 你會點樣處理同「鄰國」嘅外交問題？ 你會點樣說服全香港人支持你啲政策，你啲改革？ 呢啲全部都係非常非常困難嘅問題。（相比之下其實打倒共產黨真係容易好多。）真係想推動改革嘅人，面對住係一座咁樣嘅高山。

當然，作為一個鳩叫口號嘅賤民，你其實唔需要諗咁多。你以為上街鬧下差佬，叫下特首落台，侮辱下共產黨就覺得條氣好順，fine，冇問題嘅。我本人非常體諒你嘅情緒需要，不過我唔係同賤民講緊嘢。有意帶領香港走出現時嘅困局嘅人，應當要睇得到前面嗰座山有幾高。唔單止係「非建制派」，其實就算你喺建制之內，要做擦鞋以外嘅任何嘢，都一樣咁困難。政策固然可以好 piecemeal 咁見步行步，但大家都知咁樣長遠嚟講係唔work嘅。所以大家都迷失。

好嘅理念，好嘅論述，就好似夜空嘅北極星咁，可以引領大家往同一個方向前進。每一個國家，每一個民族，每一個成功嘅組織，都有佢哋自己嘅北極星，有自己一套理念同價值觀。香港人係犬儒嘅，上一秒口頭講幾句理念，下一秒已經係講緊賺夠錢移民。或者你會覺得好多理念都係on9，不過呢個世界上有咩 on9 得過人生終極意義就係賺夠錢移民吖？唔係話賺錢移民本身係 on9，但最終你都係追求緊一啲嘢先會想走，而其實絕大部份香港人係講唔出嗰樣係乜嘢嚟。

講到尾，其實香港人欠缺嘅，係存在嘅意義，係一套可以自圓其說嘅價值觀。呢啲就係所謂哲學，所謂理念，所謂論述。如果冇咗呢啲嘢，就算俾你打倒共產黨，你都只會感到一片虛無。

（原文於 2017 年 8 月發佈，略有修輯）