王子病

男人睇女人好現實嘅。

男人未必要求女朋友有苟姑娘嘅外表身材，但起碼都要過到「法官大人」嗰關吖，否則洞房花燭夜，你最好帶埋個嘔吐袋上陣，免得一陣忍唔住砰一聲開門飛奔出房，咁就唔好啦。（花燭夜支蠟燭係咪用嚟俾兩人喺黑夜中驗下真身架其實？）

當然啦，如果你係遇到「真愛」就唔同計法。「真愛」係金手指嚟，可以令兩個人超越一切障礙，同偕共老。但係，喂阿哥，呢個世界邊有咁多「真愛」呀？

平時大家就識得恥笑港女「公主病」，即係佢哋會覺得冥冥之中有個「白馬王子」無條件咁鍾意自己，然後 happily ever after。咁低 B，你唔係信呀？ 如果你覺得咁樣真係好低 B，咁就不如問下自己，男人幻想自己係一個「心地善良嘅普通好人」，無端端搭上女神，然後 happily ever after，呢個故仔同 《灰姑娘》 有咩分別？（答案：冇呀！）

如果男人希望女伴有幾分姿色係正常，點解女人唔可以要求男伴有返「基本」嘅經濟保障？要求還要求，現實還現實，好多男人，評論女性就講到自己勁高要求，庸姿俗粉不入法眼，但當你見過佢條女咩樣，⋯⋯⋯。其實啲女話要男人揸住幾層樓，都係車大炮咋嘛（通常）。

講到尾所有嘢都係供求問題，當有人鳩痕閪痕，就會自動降低要求架啦。

男女關係講到咁「現實」，係咪好唔浪漫？係架喇，唔通幾十歲人仲信 Cinderella 咩。如果女人唔講外表唔講錢，淨係要「真愛」，佢只會比拜金港女嘅要求更高。有車有樓嘅人，隨街都搵到幾百個，但「真愛」有幾多個？可能佢個 true love 出生在 1874 呀，邊個話一定會存在？

講咗咁多，可能大家會以為我係個現實主義者。唔係。Nothing can be further from the truth. 如果你相信真愛嘅，咁你就要相信緣份。有緣就會遇到 The One 架喇，所以出面有幾多拜金港女，男女供求失衡，又關你叉事咩～～～～

認咗佢啦，你哋全部都患上咗「王子病」。你哋以「真愛」之名去攻擊港女嘅「現實」，唔係浪漫嘅體現。你哋只不過係幻想自己做咗 Mr. Cinderella，身無過人之處，就妄想有女神幫你執玻璃鞋。醒下啦，童話世界唔適合你架。

（原文於 2017 年 2 月發佈，略有修輯）