只准資本家放火，不許百姓點燈

科技公司喺「創新」嘅過程中，好多時都會踩中法律灰色地帶。 Uber 明目張膽噉喺全世界觸犯當地的士條例，仲可以周圍串串貢話改變世界；YouTube 上面幾十萬首侵權歌曲影片日日有人播放，照樣順利營運；近年最出名嘅例子應該係 Theranos，一間據稱值 90億美金嘅高科技驗血startup被揭發造假，據報所有對外宣稱嘅科研成果原來只係子虛烏有，竟然噉都呃咗全世界好幾年。你以為咖啡機兄弟喺 kick starter 呃咗幾百萬好離譜？你哋真係未見過大蛇痾尿呀。

我諗絕大部份成功嘅公司都曾經做過踩界嘅嘢。問題係你有冇俾人捉到。想唔俾人捉到有好多方法，例如最好保持身家清白、冇案底、例如盡量唔好留底證據俾人捉到把柄、例如同政府官員打好關係、例如提升公眾形像、例如請返幾個 well connected 嘅大人物入董事局。

如果咩都唔做，有咩後果？ 美帝嘅全球通緝令可以搞到你永無寧日。唔知大家仲記唔記得 Megaupload？原來係 Megaupload 係間香港公司嚟。創辦人 “Kim Dotcom” 係德國人，2003 左右搬咗去香港住，期間成立咗 megaupload，後來移民紐西蘭。2012 年，美國政府話 megaupload 涉侵犯版權，封晒佢全球資產、封埋佢啲 server、要紐政府引渡佢去美國受審。

我唔知大家記唔記得 megaupload 係咩嚟啦。大概就係好似 dropbox 噉嘅服務，可以 upload 同 download 檔案，仲可以分享俾人。實際上好多人用 megaupload 嚟分享啲侵權嘢，但係所有檔案分享嘅服務都有呢種問題架啦。據聞 MyAV Super 都用 google drive 嚟播片 ，又唔見 Larry Page 俾 FBI 敲門問候？ 係咪噉話。

當然啦，Kim Dotcom 本身就係一個奇怪到不得了嘅暴發戶，有幾次案底，私生活又糜爛不堪，點可以同矽谷嘅精英相提並論？唔告佢，告邊個？ 所以話咩「法律面前人人平等」，只係一句欺騙賤民嘅說話。法律唔係用嚟保護你嘅，係用嚟保護啲資本家嘅財產。以前興講「搵食啫，犯法呀？」，仍然係緊守法律定下嘅「道德底線」。不過而家就興講「搵食啫，犯法又點呀？ dllm！」，簡直係大時代嘅進步。面對荒謬嘅法律、荒謬嘅立法程序、荒謬嘅立法機關，呢種態度應當如是。

不過，面對法律嘅荒謬，大家千祈唔好只流於表面同廉價嘅同情。全城為明目張膽嘅犯罪者辯護嘅時候，你哋有冇諗過其實仲有千千萬萬個獄中冤魂被同樣嘅不公義法律所迫害？如果佢哋因為冇咁出名、因為出身比較差、因為冇人脈冇得賣同情，所以大眾冇為佢哋辯護，噉你哋片面廉價嘅同情只不過係在不公義嘅制度之下雪上加霜。人生而平等，所以我認為每個人都起碼應該有張免費出獄卡。

只要冇法律，就冇不平等，就冇歧視，人類先至有真正嘅平等。只有完全解構「法治」呢個都市傳說，將「奉公守法」嘅迷思從香港人核心價值驅除，前面先至有路可走。

和平真好。

[1] 真係估佢唔到，去到 2015 年香港高等法院仲係有單案處理佢資產被凍結問題