出賣樽鹽有咩所謂？最緊要有大波妹喺屋企等我

如果只係睇表面嘅題材，我差啲就以為《小男人週記3》係一套向香港社會懺悔嘅電影。

事隔廿幾年，仍然係鄭丹瑞飾演主角梁寬，但佢今非昔比。梁寬搖身一變，成為咗某上市公司集團老闆嘅助理。佢買咗間獨立屋，平日坐開篷跑車返工。點解忽然發咗達？好簡單：每日擺低「樽鹽」喺屋企，專門幫老細出埋啲屎橋，處理啲 dirty jobs，幫公司賺錢無所不用其極。

呢間上市公司絕對唔係領展，但同領展一樣，做商場物業管理。佢哋不斷壓窄租戶，對附近嘅街邊小販就趕盡殺絕。梁寬或者係覺得對唔住佢哋，返工路經小販檔，買串魚蛋，俾咗五百蚊。或者人真係有惻懚之心都未定，但呢份心意亦都僅僅係值五百蚊而已。梁面對老細，仍然係笑騎騎係咁擦鞋，老細叫到咩都肯做。搵兩餐啫，有錯咩？ 好似係。

後來戲中有一幕，嗰間「唔係領展」嘅財團派人驅趕小販，活生生就係喺螢幕上重演良景邨事件。劇情安排太子爺王浩同梁寬個女喜喜出手救咗受咗傷嘅婆婆，似乎係想同觀眾講下呢啲事件嘅不公義，但呢個議題好快就喺主角嘅視角消失，冇咗下文。唔係話我唔同情你哋班小販呀，但本席屋企入面有個34D周秀娜等緊我，你明唔明白？

主角梁寬嘅惻懚之心可能真係爆晒登，但正如孟子所講「君子遠庖廚」，逃避就見唔到，肉就一定要繼續食，洋樓一定要繼續住，跑車一定要繼續揸，你哋班小販俾人趕盡殺絕？ I feel so sorry for you。

梁寬自嘲話自己不斷講 sorry，表面上似係表達自己對現實感到無奈，但我不期然諗起涼宮春日吐嘈大王阿虛。主角嘅獨白係咁講到現實有幾無奈，要點樣出賣尊嚴，但退一步睇返佢處境：幾十歲人有車有樓，夠錢退休，個黃臉婆死咗，換嚟嘅係一個對你不離不棄嘅 34D 秘書妹妹，仲有個肯留喺你身邊陪你嘅寶貝女，作為年過半百嘅男人仲有咩好挑剔？

如果俾主角揀，一係做個正義嘅窮撚，一係做個出賣自己原則嘅有錢人，我好肯定，俾佢揀一百次都係會揀後者。面對社會上不斷湧現嘅問題，就算自己有份造成呢啲情況，佢都唯有講句：「Sorry，我都唔想架。」「Sorry，我無能為力」。

愛就係選擇，現實就係咁現實。我諗呢套劇嘅賣點除咗係啲囡囡之外，另外一個隱藏嘅賣點，就係個 narrative 可以幫啲養尊處優嘅中產辯護、解說，令佢哋覺得，生活真係無奈，自己真係唔係坊間所講咁不近人情。

PS: 周秀娜同鄧月平好養眼，好在有囡囡睇，否則隨時負評。不過鄧月平嘅演技就掙少少，欣宜做戲都好過佢呀 XD

（原文於 2017 年 2 月發佈，略有修輯）