中港融合，好處多多

呢排我一直都諗緊一國一制可以解決香港「殖民」嘅現況，但未夠料去寫。點知一開臉書，喜見 毛來由 已經寫咗[1]。我諗佢篇文講咗我心目中嘅一半想法，或者餘下嘅論點佢只係冇明言而已，我順便畫埋出腸啦。

有句說話叫做「朝中無人莫做官」。以而家中共管治香港嘅模式，香港特區政府在憲制上要聽命於中央政府，而中央政府唔肯放權的話，香港政治就變得好被動，受到北京主導。呢個問題，正正係香港人對政治覺得無力嘅主因。

當然第一種脫離呢種狀況嘅方法，係獨立。港獨論述大致上係咁出現嘅。不過正如 毛來由 所講，除咗獨立，仲有另一招叫做「合併」。

同中國大陸「合併」當然係有若干壞處，呢樣嘢所有香港人都明白，我唔需要花時間再複述。我呢度係想帶出一啲大家未必諗過嘅「好處」，等大家可以衡量利害。只要香港喺政治上同中國大陸合併，就有機會解決「朝中無人莫做官」嘅問題。今日啲所謂建制保皇黨，只不過係一班揣摩上意嘅地方芝麻官，同喺北京做國家決策嘅人有好大距離。香港「朝中無人」，就唯有聽中聯辦老點。要打破呢個困局，香港人就要爭取加入共產黨嘅權利，加入政治局嘅權利，甚至係競逐政治局常委嘅權利。

當然我喺度鳩噏啦，各省市黨委都唔會用返本地人，不過無論如何，喺國家機制下如果香港人有些少話語權，起碼好過成班港共走狗淨係識喺香港亂咁吠，狐假虎威。

香港而家好缺乏國民教育，唔講中共嗰套啦，你睇返例如美國嗰啲，人哋細細個就話「我大個咗要做總統！」雖然呢啲係童年幻想，起碼都叫做理直氣壯，可能佢日後唔係做總統，但做咗市長、州議員，咩都好，都叫做係有個「career path」，有一條為國為民嘅一條出路。然後睇返香港，盲嘅都知香港行政首長只係一個要唯命是從嘅地方官員，要呃小朋友話大個想做特首都好難。從政嘅人，假假地都會有啲政治理想，唔會想做應聲蟲。所以，撇除港獨暫且不提，喺「一國兩制」但冇自治嘅情況下，有政治理想嘅人，最合理嘅出路，唔係去選立法會，唔係去考AO，而係加入共產黨，為全國十三億人民（包括香港人）服務呀。 [ 所以我一直都話要投共架~~ ]

我諗其實香港人只要對自己嘅「核心價值」有信心，識得定義「自己」，無忘初衷，唔會在中國政治制度下迷失自我，真係唔應該太害怕「融入」中共嘅機制。當然，其實理論上，加入共產黨呢啲嘢，唔搞一國一制都得嘅，不過中港制度如果太過唔同，始終會隔咗一層。佢當你係外人，一句「勾結外國勢力」已經百詞莫辯。

所以對我嚟講，在港獨路線之外，另一個比較「可行」嘅路線就係 ** 爭取香港人加入共產黨、加入國家政治機關嘅權利。「本土愛國」係有得搞架，只要本土派努力投共的話，或者比港獨會有更豐碩嘅成果。（好似係

— -

PS: 我成日都話投共係真心架！直線架！個個都唔信！

PPS: 我唔知香港人係咪有啲奇怪門路加入共產黨啦，但就算有，我係講緊呢種情況正常化、常規化呀~

[1] 《盡快一國一制，終結香港殖民困局》http://www.vjmedia.com.hk/articles/2017/07/29/165420/

（原文於 2017 年 7 月發佈，略有修輯）