【法律掃盲】刑罰追溯力

聽聞林鄭今日冇排除國歌法有追溯力，仲舉咗「印花稅修訂條例草案」為例子說明法律追溯期早有先例。 首先交稅係算係民事責任，國歌法嘅內容應該係刑事責任，兩者冇可比性。事實上，《香港人權法案條例》寫明刑事罪同刑罰唔可以有追溯力：

／／第十二條 刑事罪及刑罰沒有追溯力

(一)任何人之行為或不行為，於發生當時依香港法律及國際法均不成罪者，不為罪。刑罰不得重於犯罪時法律所規定。犯罪後之法律規定減科刑罰者，從有利於行為人之法律。

(二)任何人之行為或不行為，於發生當時依各國公認之一般法律原則為有罪者，其審判與刑罰不受本條規定之影響。[比照《公民權利和政治權利國際公約》第十五條] ／／

呢個《香港人權法案條例》唔係一般法例，而係《基本法》第 39 條嘅實踐：

／／ 第三十九條

《公民權利和政治權利國際公約》、《經濟、社會與文化權利的國際公約》和國際勞工公約適用於香港的有關規定繼續有效，通過香港特別行政區的法律予以實施。

香港居民享有的權利和自由，除依法規定外不得限制，此種限制不得與本條第一款規定抵觸。 ／／

留意《香港人權法案條例》嘅條文會寫明佢參照《公民權利和政治權利國際公約》，所以根據《基本法》第 39 條，香港立嘅法例如果同《香港人權法案條例》抵觸，係違反《基本法》嘅。

林鄭呢番言論，唔知算唔算係違反《基本法》，但一係有人冇熟讀《基本法》，一係有人叻唔切自我賦予對《基本》嘅解釋權，兩者都係對《基本法》不尊重，有違香港特區首長嘅憲制責任呀。

至於有班人話「普通法」之下刑事罪冇追溯力，真係心諗，大佬，唔識就咪鳩噏啦⋯⋯ 嗱我係唔識嘅，不過隨便都搵到啲嘢⋯ https://en.wikipedia.org/wiki/Ex_post_facto_law… 即係咁，維基百科未必啱晒，不過你搵啲好啲嘅 authority 出嚟支持你哋嘅講法再算啦~ :0)

（原文於 2017 年 10 月發佈，略有修輯）