【法律掃盲】「奏唱」同「播放」係唔同架！

呢排有啲忙，冇時間緊貼時事。不過喜聞人大常委通過將《中华人民共和国国歌法》納入《基本法》附件三，我呢個愛國本土派唯有睇下發生咩事，關心一下香港事務。

呢幾個星期係咁見到啲好鍾意講政治嘅人係咁話，《國歌法》通過之後，可以玩嘢周圍亂咁播國歌，「迫」到其他人要莊嚴肅立，阻擬社會有效運作，從而突顯《國歌法》之荒謬云云。

我有時覺得，香港人咁多文盲，真係拖低中國嘅識字率。嗰班人執著嘅係《國歌法》第七條：

「奏唱国歌时,在场人员应当肃立,举止庄重,不得有不尊重国歌的行为。」

「奏唱」係咩意思呢？奏係演奏，用樂器嘅；唱係唱歌，用口嘅。究竟香港有冇人有本事帶住一隊樂隊，周圍「奏唱」國歌去玩9人，迫人莊嚴肅立？ 我諗冇囉，如果真係有人咁做嘅話，即係攞國歌去戲弄人，點睇都係違反《國歌法》第六條：

「奏唱国歌,应当按照本法附件所载国歌的歌词和曲谱,不得采取有损国歌尊严的奏唱形式。」

咁可能有啲唔識字嘅天才會去拗：可能播放都算係「奏唱」嘅一種形式呢！ Well, 予欲無言呀，不如睇下《國歌法》第一條點寫：

「为了维护国歌的尊严,规范国歌的奏唱、播放和使用,增强公民的国家观念,弘扬爱国主义精神,培育和践行社会主义核心价值观,根据宪法,制定本法。」

好明顯，「奏唱」同「播放」係分開處理嘅。再睇下第十三條：

「国庆节、国际劳动节等重要的国家法定节日、纪念日,中央和省、自治区、直辖市的广播电台、电视台应当按照国务院广播电视主管部门规定的时点播放国歌。」

電台、電視台係「播放」唔係「奏唱」架！所以有人話電視播國歌，所有人就要肅立乜乜柒柒，真係文盲嚟架，好心讀下書先廢噏啦。

最後我想講嘅係，大家唔好以為偉大嘅「全国人民代表大会」真係咁低B先得架。世界文明大國，點會寫個《國歌法》都寫唔掂呀。啲講政治嘅人以為自己好叻，其實真係柒到冇朋友。明明「播放」同「奏唱」喺繁體簡體都一樣，正常識中文嘅人冇理由睇唔明架喎，返去讀好啲中文啦。

咦？！定係其實大家未睇過《中华人民共和国国歌法》架？不如我貼埋條 link 出嚟吖！唔使翻牆都睇到架！

http://www.npc.gov.cn/npc/fujian/site1/20170901/1078d2c86a3d1b138cce01.pdf

又話時話，如果未睇過法律內容就反佢，好似真係好容易柒咗架喎。不過香港人講政治，都係「講下」就好喇，認真你就輸了，我今次真係輸到貼地呀。過幾日又講另一單嘢架啦，到時奏唱國歌嘅時候大家咪又係乖乖咁莊嚴肅立？嘻嘻。嘻嘻嘿嘿。