《逃恥》唔只係俾毒男FF嘅電視劇

由於某玩命KOL早幾日大讚《逃恥》（逃げるは恥だが役に立つ）係「已婚男性嘅韓劇」、「睇到喊咁滯」，我好奇心驅使之下就睇下咩嚟。

然後唔覺意就一日煲晒成套 orz 好彩佢短，得十一集，可以一日煲晒，否則以我煲戲煲書「一睇就要睇完晒先瞓」嘅性格，真係天光都冇得瞓。

（以下或含劇透⋯我懶得理透咗幾多⋯）

套劇係幾好睇嘅，可能因為有新垣結衣嘅關係，無視劇情都唔太緊要。但劇情係咪正如坊間所講，係一套幫毒男打飛機自high嘅劇集呢？我又覺得未至於。《逃恥》嘅主線劇情係講一個三十幾歲冇拍過拖嘅毒男，無端端俾個奇怪美女送上門求婚，然後個女仔仲要無視靚仔嘅追求，花盡心機嘗試為佢打開心扉，的確係足以令到世上千千萬萬個毒男多咗好多不切實際嘅幻想，但我回想整套劇嘅內容，卻覺得不止於此。

劇中有戲份嘅人十居八九都係社會上會受到若干歧視嘅小眾，除咗男主角之外，老處女、老基佬、小基佬、海歸女，佢哋喺主流社會爭扎嘅心路歷程，《逃恥》都著墨不少。甚至感到編劇想帶出個訊息：靚仔都會情傷，靚仔都會俾人歧視架。啲人以為佢靚仔就一定係薄情，一定對感情唔認真，但其實靚仔都可以有心肝架。就算係人見人愛嘅結衣 BB，佢嘅角色雖然係個可愛大美女，但性格太過異想天開，所以就算人靚學歷高，都難以融入日本企業文化，大概亦都算係代表緊某種「小眾」。

所以，諗到呢處，我忽然覺得：「嗚呀，好左膠呀！！」呢套電視劇其實唔只係為毒男自high材料，而係左膠嘅自high吧⋯⋯ 我真心係咁認為。以谷阿莫嘅術語嚟講，一套公式戲一定包括「大魔王」呢個角式，但《逃恥》入面幾乎個個都係「好人」嚟！編劇連花心帥哥、口賤狐狸精都要觀眾嘗試去同情理解呀。仲有，連資本階級嘅老闆炒咗男主角，都係為咗保住生意，為咗保住啲要養妻活兒嘅員工，所以都要同情地體諒呀！編劇嘅大愛，真係超越埋左膠，去到超凡入聖嘅地步喇！

《逃恥》咁大愛，當然要為世界上千千萬萬位未拍過拖嘅中年毒男開脫，以 FF 劇情為佢哋帶來希望啦，我覺得啲 FF 都唔算太過份。韓劇之所以被人話係毒藥，係因為會教到啲女仔不切實際咁將自己投射成劇中嘅公主，但《逃恥》感覺上又好似唔多係咁樣。如果淨係睇頭幾集，的確會令人覺得 FF 得太嚴重喇。現實世界係唔會有個大美女送上門幫你做 “maid” 然後向你求婚架！（真係唔會架！醒啦！）

但最後幾集，男主角被炒魷開始，劇情反而開始返回「現實」。男主角為咗慳錢，想同女主角「真結婚」慳返一筆，女主角作為一個「異想天開嘅左膠女」，反對男主角以「愛」嘅名義剝削佢做家務嘅勞動，就算佢明明已經好冧男主角，都拒絕咗佢嘅求婚。然後，兩人重新訂立對等嘅夫妻關係之後，佢哋為咗金錢、時間、家務分配嘅問題，抱怨、爭執、談判。雖然只係輕描淡寫咁帶過，但係始終都算擺脫咗「happily ever after」嘅童話式幻想。大結局嗰度，連「離婚」呢個可能性都夠膽死提出。男女主角未來「離婚」嘅可能性呀！果然搵結衣BB賣萌，真係乜都得架屌⋯

見到網上有評論話「逃避可恥但很有用」呢個主題 somehow 貫透整套劇集，但我又真係睇唔出真係有好多「逃避」。如果呢套劇除咗 FF 之後有更深一層嘅「主題」，應該係「如果肯用對方角度去想想，世界就會更加美好」吧。呢個主題，唔只係男女主角最後學識相處嘅方法，更加用咗嚟令觀眾諒解劇中每一個角色嘅決定、取捨，即使係僱主看似無情炒人魷魚，仲要炒咗最叻嘅員工，都係架佢苦衷架。

我唔知「夫妻相敬如賓」係咪真係所謂王道，但劇中男女主角嘅相處，就體現咗呢一點 （當然佢哋大部份時間根本唔算係夫妻啦）。中華禮教傳統話咁樣係理想夫妻關係，但現代好多人評批呢樣唔合現實，話兩人相處係要咩磨合，甚至話如果冇啲疾妒就證明佢唔在意段關係云云。或者以前「盲婚啞嫁」嘅年代，好似《逃恥》咁樣起初不涉感情，就比較易做到「相敬如賓」啦。我而家未(/冇?)結婚，冇資格論斷「相敬如賓」現唔現實，但我同愛人相識相處幾年，佢一直都冇老奉因為我係「男朋友」就要我點點點，我自問都應該冇老奉要佢接受啲咩（掛）。最初相識嗰份安逸仍然存在；兩個人之間嘅私人空間，都仲有好多。嘛，拍拖拍到好似冇拍咁樣，呢種咁異想天開嘅相處之道，真係唔係我諗出嚟嘅，但體驗過自由嘅好處，真係返唔到轉頭架。

（原文於 2017 年 1 月發佈，略有修輯）