飄風不終朝，驟雨不終日
要建立長久嘅嘢，喺今時今日，非常困難。喺資訊泛濫嘅年代，無論你做啲嘢有幾勁，最多都只係會得到 15 minutes of fame。然後，就會被大家遺忘。
究竟有咩嘢，可以保留起碼十年廿年，都仲會有用，仲會對社會有貢獻？
喺講究「快」嘅時代，呢個問題似乎好少人問，更加少人重視。記得有人講過，人類每日產生唔知幾多 zettabytes 嘅資訊，但幾千年後嘅考古學家，睇返廿一世紀嘅遺跡，會咩資料都搵唔到。話知你一隻硬碟儲到幾多 TB 嘅資料，過幾十年呢隻硬碟壞咗，就係廢銅爛鐵。
而家全球市場經濟運作模式，越嚟越變咗「搵快錢」。你睇啲電影，幾千萬甚至幾億製作費，拍咗出嚟，戲院上映幾星期就玩完。IMDB 收錄咗 383 萬套映畫，當中有冇 1% 嘅戲會喺播映之後得閒俾人拎返出嚟睇下？斷估都冇。九成九嘅作品，就算佢當年點樣風靡全球，最後都只會無聲無息咁消失於世上，或者喺某個圖書館苟延殘存。
據聞 Pokemon Go 而家風行全球，一時無兩咁話。但係過多二十年，仲有冇人會繼續玩？就算有，啲玩家得返而家嘅一成都未必有。資本主義搵錢為上，當一壇嘢賺唔夠錢，啲 server 又要請人睇住，計完條數唔化算，自然要熄 server 告別世界。之後，嗰隻 game 就好似從來冇存在過咁，你想玩都玩唔到。有幾多隻遊戲可以好似 AOE II 咁，出咗差唔多廿年之後，官方更新隻 game 然後仲有人玩？
當然，從一個經濟右翼嘅角度，賺錢嘅人賺咗錢，想玩遊戲嘅人又玩得滿足，你仲想點？今時今日文明世界如此富足，都係靠資本主義制度分配資源，令啲資源（大體上）有效投資去製造大家想要嘅產品。但當今嘅制度，係短視嘅。例如王晶嘅賀歲片，年年都差唔多。係有人睇呀，不過其實啲觀眾睇返兩年前嗰套都可能一樣咁開心。TVB 周末成日播舊戲，大家都會睇啦。只不過市場形造個氣氛出嚟，冇人肯俾錢睇舊戲，所以先會有人年年照辦煮碗係咁拍爛片嚟賺錢。
我所批判嘅，唔係從文化角度批判大眾嘅沉淪，亦唔係批判資本主義對文化或其他價值嘅破壞，而係從右翼觀點，批判現今呢個全球市場嘅效率。經濟右翼講究效率，但當你明明同一套戲，橋段九成相似，你做咩要耗資億萬，走去拍十幾廿次？分明係極低效率嘅事。
而家個情況就係，市場每推出一樣新產品、新作品，就將之前嘅嘢蓋過、淹沒。全球市場越係一體化，單一產品賺嘅錢就越多，製作費就可以越高。所以而家荷里活啲新戲，每套都億億聲，過一排就冇人記得。所以而家啲新電子產品，研發又係億億聲，過幾年就變廢鐵。好多喺市場上曇花一現嘅產品，未及得切喺世上留下烙印，就已被世人遺忘遺棄。
究竟新嘅好，定係舊嘅好？斷估都係新嘅好。認真，通常真係新嘅好啲，我唔興泥古或懷舊。但個問題係，好多時新嘅嘢，消耗龐大資源去研發，但其實未必好過原本嘅，可能只不過係包裝靚少少，宣傳手法好少少，同埋啲人先假設咗新嘅好過舊。
我哋每日都遺棄緊曾經無數咁多人投注無數心血嘅產品同作品。有時我哋停一停，諗一諗，會發現新嘅未必好過舊嘅。例如 Windows 10。又或者你開始覺得，年年換手機，啲功能都差唔多，冇咩新意，不如等多兩年先換。然後，市場開始對不斷「更新」嘅產品厭倦，需求開始下降。需求下降，然後嗰啲原本億億聲嘅研發預算，就會俾人 cut 到渣都冇。冇研發資本，下一期嘅產品就更加唔會有新嘅改良，最後市場只可以繼續供應原本已經研發好嘅產品。再過多一陣，可能連呢樣都做唔好，但啲舊嘢，已經唔記得咗點整。資本主義就會崩潰，我哋嘅文明可能會倒退幾十年（放心，唔打仗嘅話，斷估唔會返返石器時代）。
我對未來係充滿瞳景嘅。究竟我呢番預言，會喺二十年後、五十年後、定係一百年後發生？ IT 人唔會話你知佢哋平日處理嘅訊息係幾咁複雜，幾咁散亂，幾咁難以管理。佢哋只會用更複雜嘅工具，例如十年後會變廢鐵嘅硬碟，廿年後冇人識用嘅軟件，同埋三十年後冇人開到嘅數據格式，去處理越嚟越多嘅資訊。啲工具越精準，就越唔容許任何差錯，即係越脆弱。人類構築一啲自己都難以理解嘅系統，企圖超越自己天生認知嘅限制，可以話係冒犯上帝，對上帝嘅褻瀆。究竟人類爬得幾高，先至會被摘回凡間？定係中途會識得收手？我唔知。所以，我對未來係充滿瞳景嘅。
末日未到之前，我會繼續實踐經濟右翼嘅倫理責任，即係繼續搵錢。如果我嘅工作會間接導至三十年之後地球大爆炸，咁我都冇計架；不過同時，睇住前面啲車就嚟炒埋一碟，我會覺得，將自己架車駛返去避車位，謙虛返少少，唔好同上帝角力，可能最後真係會整到啲嘢出嚟，喺末日之後，都繼續存在，甚至連「新新石器時代」嘅人都可以受惠，咁都唔錯。
至於我上面提出嘅問題點樣處理？ 喂，篇文太長喇，唔講喇。何況只要社會一直進步，最後點都會出現馬克思式共產革命架啦。大家等死啦。
《老子》曰：「希言自然。故飄風不終朝，驟雨不終日。孰為此者？天地。天地尚不能久，而況於人乎？」
（原文於 2016 年 7 月發佈，略有修輯）