絕對唔科學嘅念力

近日新界東補選，潮流興講投票策略。呢啲嘢，我唔熟，唔講。不過講起投票，我就有另一番感受。

因為我咁大個人都未投過票。

咩立法會呀、區議會呀，從來都冇投過。

我知咁樣唔多好，但其實咁嘅態度係「理性」嘅。因為只要其他人都肯去投票，咁就無論我投或唔投，都對選舉結果影響甚微。

我知道咁樣諗實在好冇公德心，話晒投票都算係公民責任。所以我呢幾日就喺度反思，究竟我自己決定唔投票，會唔會影響其他人呢？

假設好多人[1]都好似我咁，對所有參選人有保留，同埋懶，寧願星期日成日碌 facebook 都唔肯出門行幾步路投票。咁當然「懶」唔係絕對嘅。如果有個參選人我真係好支持，咁懶極我都會投個票嘅。

如果用一般嘅科學角度去睇呢件事，我決定投唔投票，同其他人根本完全冇關係[2]。好明顯係獨立事件啦？我決定投或唔投，只在我一念之間。我冇理由可以靠念力去影響其他人嘅決定架嘛⋯⋯

⋯⋯ 除非可以啦。

問題嚟喇。我決定去唔去投票，唔單止係「自由意志」驅使架嘛。我會受到當時政治氣氛，參選人嘅質素，甚至可能因為天氣嘅好壞，而影響我投票意欲。所以，我投唔投票，對於其他人投唔投票，係有一定關聯 (correlation)。

呢個時候啲科學膠就會大聲背誦金科玉律：「correlation does not imply causation」。呢樣嘢我認同嘅。但而家弔詭嘅問題係，我一方面主觀咁認為自己有自由意志決定去唔去投票（i.e. “I cause my own actions”），另一方面卻觀察到原來一個人投唔投票受到好多客觀因素影響。

如果好粗疏咁將呢兩樣嘢夾埋一齊，個結論就係我嘅自由意志可以影響大家投唔投票 🙂 🙂 🙂

我知呢個結論非常唔科學。但只要你接受所謂嘅「自由意志」，咁無論你結論係點，都會同我呢個結論一樣咁唔科學。只要你相信呢個世界（包括你嘅腦）係根據物理定律運行，咁所謂「自由意志」只係一個好籠統、唔精確嘅模糊概念。呢個概念肯定唔科學 [3]。但係當我嘅意志好努力咁掙扎緊落唔落街投票，呢一刻其實真係唔存在咩客觀科學原則。當我掙扎緊嘅時候，我嘅意志明明係可以好「自由」咁決定我做啲乜 [4]。呢個係「我思故我在」一樣咁清晰嘅主觀事實，無容置疑。

但同時，我決定投唔投票，同其他人投唔投，係有一個明顯嘅關聯。呢個亦都係無容置疑嘅客觀事實。當我掙扎緊投唔投票嘅時候，如果我接受呢個客觀關聯，而同時我又好清晰咁感受到我意志嘅自由奔放，咁呢一刻，我決定去唔去投票，就會直接「影響」到其他人嘅決定。

呢個 paradox 應該點樣處理呢？我其實覺得就算接受「我自己嘅決定，會影響其他人嘅決定」，都可以係一個 consistent 嘅世界觀。當然呢個世界觀唔科學，大家喺 《Nature》 出論文唔好講啲咁嘅嘢喇。但真係 consistent 架嘛。念力嘅威力真係好強大。

話時話，我上面講嘅係「投唔投票」。不過同樣嘅理論，都可以應用喺「投俾邊個」呢個問題上。所以，大家鍾意一個參選人，就投佢啦。你嘅念力絕對可以影響其他人嘅投票意向架。你諗下，無論你投邊個都好，你投咗一個贏嘅參選人嘅機率，真係最大架，因為最多人投贏咗嗰個嘛 [5]。

－－－－

（原文於 2016 年 2 月發佈，略有修輯）