矛盾唔係錯：點解我哋需要一致性？

大家唔好以為「矛盾」就一定係錯，「一致」就一定係啱。兩樣嘢各有所用。

稍為學過邏輯嘅都知道，任何邏輯系統如果有 X ^ ~X，咁就可以推斷到任何陳述(statement)。一個推斷到任何嘢嘅邏輯系統，用嚟尋找真理未必有用，但好多時，我哋唔係想尋找真理架嘛。例如，一個政棍，可能今日支持某立場，聽日就反對。咁只要佢處理得好，支持嘅好處佢又得到，反對嘅好處又得到。只要佢用一個充滿矛盾嘅邏輯系統去敍事，就必定如有神助：搬龍門、轉立場、馬後炮，乜招數都可以用。呢啲就係「矛盾」系統嘅作用。所以學邏輯學嘅朋友，唔好因為發現咗矛盾，就當完咗件事。矛盾係實實在在嘅妙用，大家千祈唔好輕視佢。

咁但係，如果「矛盾」咁好用，大家研究邏輯一致性又有咩謂？不如接受咗 X ^ ~X，然後收工啦，咁咪幾好？你可能話，咁總有啲嘢係真，有啲嘢係假架嘛，尋找真理嘅人，點可以馬虎呢？ 呢個係一個原因。但，世界上究竟有冇客觀嘅真理，講唔埋。就算有，係咪可以靠正確、唔矛盾嘅邏輯去推斷出嚟，真係好難講。Gödel 乜乜乜呀嘛。

咁邏輯一致性有咩用？好簡單，就係集中力量，有效咁使用力量，唔好俾啲力量互相抵消。例如，一個人如果同時又想向北行，又想向南行，我哋話呢樣嘢係自相矛盾。自相矛盾嘅結果，唔係邏輯系統大爆炸，而係，佢寸步難行！可能佢向北行幾步，又向南行幾步，最後力量互相抵消，就變成原地踏步。呢個先至係矛盾嘅問題所在！

所以我哋可以概括而言之：想玩大包圍，要用矛盾嘅系統；想要有強大嘅力量去推動現實世界嘅改變，想法就要有一致性。

點解我哋（或邏輯學家）會認為一致嘅系統先係「正確」嘅？因為，一致嘅系統實踐起嚟，有強大嘅力量。正所謂 might is right，世事就係咁簡單。

（原文於 2016 年 8 月發佈）