特首話點就點，機場安檢你無責任架？

我唔明點解機場單嘢可以炒得咁大。

違規好大件事？炒咗決定違規嘅人囉。公職人員行為失當，輸送利益俾官員家屬，抵炒架喎。

梁老太同梁小姐冇公權，佢要同你嘈，想拎返件行李，人之常情，唔算得上係打壓。

至於特首施壓（如有），咁你都要睇返個命令係 law 唔 lawful 架嘛。香港人唔係最識十問九頂架咩？唔係最識蛇王唔做嘢架咩？忽然唔識喇？

香港人冇腰骨、冇承擔，做錯事就賴政治打壓，咩都賴晒特首，即係想點？ 不如搵個「救世主」做特首，總之佢所有決定都正確嘅，大家聽聽話話就一定冇錯，冇其他人需要負責任。咁樣香港咪有救囉！

講民主？嘻。大家都係想要個開明嘅獨裁君主啫！起碼飯民個個都係囉~~

每一個同情機場職員受「壓力」而「無奈」違規嘅人，都係腐敗制度參與者。

就算當機場職員「唔聽話」真係會俾人炒啦。當佢俾人炒咗，會有幾十萬經濟損失啦。咁即係，佢違規就有幾十萬嘅「利益」。

咁究竟我哋應該睇成「佢唔做就有幾十萬損失」，定係「佢做咗就有幾十萬得益」？ 數學上兩樣嘢係相等嘅。

一個健康嘅社會，應該要＊假設＊做正確嘅事係「應份」嘅。如果某個程序某個規矩好重要，我哋應該假設每個人都遵從。每個受賄嘅人，都覺得自己好慘好窮，所以先收錢架啫。個「慘」嘅龍門任搬架喎。你個機場保安公司高層，做咗咁多年，都叫做有返啲積蓄。佢慘唔慘得過許仕仁？許仕仁爭人錢要破產喎。但點解許仕仁收受利益就唔得，機場保安嘅高層就可以為保飯碗而違規？ 大佬，許仕仁都係為咗有得食飯先至受賄咋喎。

【左膠上身】呢個社會大把人生活低於貧窮線，生活一定慘過機場保安嘅高層。佢哋如果受賄，係咪值得同情？如果佢哋違規犯法保飯碗，係咪值得同情？如果係，咁屌你啦，大陸咁多人咁慘，賣啲毒奶粉、賣啲黑心疫苗、賣啲爆炸電視，都係迫於無奈，都係為保飯碗啫！係咪咁話？

再講多次：

＊＊＊ 每一個同情機場職員受「壓力」而「無奈」違規嘅人，都係腐敗制度參與者 ＊＊＊

（原文於 2016 年 4 月發佈，略有修輯）