消滅唔到嘅嘢，唯有包容

人類既然有自由意志，每個人嘅思想都唔會完全一致。任何地方，任何群體，無論係一個大國家，仰或係一個小組織，都會有唔同意見唔同立場嘅人。一個領袖應付啲立場唔同嘅人，只有三個方法：一、壓迫，二、驅逐，三、包容。冇任何其他方法。

呢個係政治現實嚟。任何對付異見嘅手段都只有「壓迫、驅逐、包容」呢三招。壓迫帶來反抗，驅逐帶來分裂，包容就係對原則嘅捨棄。

如果你認為某樣意見包容唔到，就唯有壓迫或驅逐。呢兩種手段都會明顯帶來某方面嘅壞處。所以，究竟堅持某個原則係咪咁重要，令你明知有壞後果都照樣要禁絕？正所謂「愛就係選擇，選擇就係捨棄」，係要取捨嘅。

取捨從來都冇話對或錯，但唔同嘅選擇會得到唔同嘅結果：如果你太多原則，太多底線，寸步不讓，就只好不斷去打壓，不斷去驅逐；如果你太過包容，又會變得面目模糊，失去自尊，失去自我。呢條界線應該點畫，正正就係擇言所講「定義自己好難」嘅體現。

一個有大志嘅人，有大志嘅組織，必須包容。如果唔包容異見，去打壓對方，就會引起內訌；如果驅逐，咁你嘅勢力就會減弱。所以只有包容，先至可以壯大。

咁政治領袖，係咪必須要包容？如果係，係咪必然會變得面目模糊，失去自我？係架。所以我討厭政治呀，我先唔想做政治領袖呀。

新年就嚟到，好多人祈願「世界和平」。究竟「世界和平」係點樣達成呢？ 就算係一家人，都難保唔會爭執，何況世界上有幾十億人？所以《Fate/Zero》最終結局，男主角想向聖杯許願「世界和平」，聖杯就話要毀滅所有人類。

只要世界上有多於一個人，就會爭執，就會分裂；包容異見，就會失去自我；堅守原則，就要驅逐或壓迫其他人。以上所有情況都唔係絕對嘅，有程度之分。包容少啲，就多啲爭執；堅持少啲，就唔需要使用過份極端嘅壓迫手段。

我唔會祈願毀滅所有人類，對於人類之間嘅紛爭當然無可奈何。我最近好鍾意話「反正殺唔死對方，唯有包容喇」。喺現有文明制度之下，包容唔包容都只係口頭嘅漂亮說話，講到尾，如果唔係殺人或搞分裂活動，大家都只係打嘴炮，最後世界咪又係繼續轉，太陽照舊升起。

（原文於 2016 年 12 月發佈，略有修輯）