本土文化傳承，合乎 21 世紀經濟效益

現代社會，風景迅速變遷，十年換一貌，一啲都唔奇。

街上嘅商店幾年就唔同晒；潮流時尚嘅嘢，更加係年年變、季季新；隨身嘅物品，手機電話首飾玩具，兩三年就換晒，無一留低。

喺咁嘅環境底下，大家都只識得「即食」，任何冇即時好處嘅嘢，任何唔係最新潮嘅嘢，都被認為係低效率、老土，喺 21 世紀唔應該存在。

但其實，我哋每年每月每日製造同拋棄咁多嘢，先至係低效率。而我哋社會亦為呢種「即食」嘅經濟文化付出巨大嘅代價。我唔係講緊「環保」，而係赤裸裸嘅經濟成本效益。例如一間商舖，兩年轉一次手，即係裝修、宣傳、建立業務等等嘅一筆過嘅成本，本身可能可以攤開十年八年甚至幾十年，而家就只係攤開兩年，梗係貴咗。

商舖只係例子。其實所有嘢都係一樣道理。社會不斷推出新嘅時裝款式、新歌新戲、新菜式、新app新遊戲⋯⋯ 所有嘢都有開發成本，呢啲成本，每次「換新季」就由頭嚟過再承受多一次，宏觀嚟講實在係一種好低效率嘅運作模式。

唔係話新嘅唔好，唔係話舊嘅先係正嘢；但係創新嘅原材料，本身係由環境所催成：如果冇新技術、新媒界，其實啲嘢變多幾次就變唔出新花款，變嚟變去價值都唔會高咗，反而會因為不斷咁變而承受更高嘅成本。如果為變而求變，因為貪新而嘗新，就好容易失去根本，迷失自己。

雖然話未來係不可準確預測，但現時可見嘅係，世界各個先進經濟體呢十幾廿年發展緩慢，已經維持唔到上世紀嗰種爆炸性發展步伐。雖然話資訊科技依家仲繼續為全球經濟帶嚟新嘅正面衝擊，但以我（作為行內人）嘅睇法，呢啲發展亦都就嚟變強弩之末。20 世紀嗰種「十年換一貌」嘅心態，究竟嚟到 21 世紀仲適唔適用？我好懷疑。

我個人睇法係，除非 21 世紀有個好勁嘅新發明，推動世界經濟再一次急速發展，否則呢個世紀嘅人，就唯有做啲所謂「低效率」嘅嘢，可能一做就做幾十年先有成果。因為，世界嘅變化已經唔係以前咁快，所以我哋反而多咗時間，反思返呢幾十年以嚟發明嘅新鮮事物，有咩係值得保留，有咩應該捨棄。

我哋每日接收海量嘅資訊，大部份都係即用即棄。朝早嘅花生，夜晚已經嫌舊，隔日更加係無人問津。究竟食完咗嘅花生，幾個鐘之後痾返出嚟，喺大家心裡面有冇留下痕迹？

唔係話食花生唔好。大家每日食嘢，都係痾返出嚟，最多重幾磅，算不上有咩得著，只不過充飢啫。不過食飯痾屎之餘，我哋有時都會問人生嘅意義何在。

每個人都有自由意志。我唔可以用自己嘅價值觀，去否定其他人嘅人生意義。有啲人會覺得只要每日有飯食，有屎痾，日日如是，直至壽終正寢，就係美好人生。可能好多人都係咁諗。咁諗係冇問題嘅。

不過你甘唔甘心？你甘唔甘心你死咗之後乜都冇，旋即被世人遺忘？你甘唔甘心你而家認為好重要嘅嘢，過多幾十年之後就喺世界上消失？

肉體嘅死亡係無可避免，但精神可以傳承。我哋傳承嘅，唔係個人意志，而係經過歲月提鍊而成嘅精華，我哋叫呢啲做「文化」，叫呢啲做「傳統」。

我哋願意付出生命嘅一部份，去傳承文化，令我哋嘅文化，變成後世嘅傳統。傳統呢家嘢，未必係即造即食，可能十年八載之後先會睇到結果，可能需要無償付出生命同歲月。但我哋若非咁做，就即一無所有。我唔甘心一無所有。

二十世紀嘅經濟學，講究市場效率：市場越大，越有效率。呢種概念，導致全球一體化嘅現象，扼殺咗無數本土文化嘅生存空間。二十世紀嘅經濟發展，建基於近代西方嘅科技文明，所以短時間之內發生翻天覆地嘅改變係時代嘅必然。

如果我對 21 世紀嘅展望係準確嘅，噉 21 世紀唔應講究「市場效率」，反而應該講「年期效率」：當世界唔再不斷翻天覆地噉改變，我哋就可以作長遠嘅投資，就算開頭一次過投資巨大，但只要長期有回報，一樣可以好有效率。

大家都聽過《愚公移山》嘅故仔。就算愚公冇天帝幫助，真係幾代子孫去移山，最後個山都總會被移走，而新開鑿出嚟嘅道路，惠澤百世千世，無論一開始成本幾大，最後嘅效率都係非常之高嘅。喺呢個模式底下，我哋唔需要追趕全球嘅市場，唔需要呃殺任何本土文化，都可以做到高效率嘅經濟活動。我哋需要嘅唔係「國際視野」，而係需要「歷史視野」。我哋放棄地域上嘅「廣闊」，轉而追求時代嘅「深遠」。人哋發明一樣新嘢，諗住用三五七年；我哋可以做一樣嘢出嚟，打算傳承起碼一百年。呢度效率嘅差別，係十幾廿倍。呢個就係文化傳承嘅效率，文化傳承嘅威力。

（原文於 2016 年 5 月發佈，略有修輯）