本土、左翼

我唔知其他人點諗，唯有講自己。所謂本土，在於「自尊」同「謙遜」之間取得平衡。做人最緊要知道自己唔係萬能，知道自己資源有限，所以要珍惜，將時間、精力、資源，都用喺適當嘅地方。愛就係選擇，選擇就係捨棄其他。所以，我以有限嘅身驅，只好愛自己，愛身邊嘅人，愛自己城市嘅人。越親近我嘅人，我就越願意投放資源去幫佢哋，去支持佢哋，呢個就係我心目中嘅本土思想。先幫自己老母，再幫人哋老母，就係咁簡單。

但我幫身邊嘅人，同時都可以希望世界上所有人都活得好，包括萬惡嘅大陸聖民。如果我有餘力，我亦不妨偶然伸出緩手幫世界上任何一個人。只不過，人類既然有自由意志，就一定會有衝突、有矛盾。如果人哋嘅利益，同我身邊嘅人嘅利益有矛盾，我會誓死保護最親近嘅人，就係咁簡單。

如果我自顧不暇，冇餘力去理會其他人，咁我亦唔會希望人哋仆街死。只要我有能力捍衛自己同自己認為重要嘅嘢，咁其他人點，我唔會理，亦都理唔到。

我好相信一樣嘢，就係多元。所以我好支持世界上每一個人，實踐自己真心相信嘅信念。每個人相信嘅嘢都唔同，所以每個人各自嘅「本土」，其實就係「多元」。我尊重每一個人真心相信嘅理念，就算佢嘅理念同我嘅價值有矛盾，我都會尊重。當然，我會捍衛自己自己嘅信念，所以如果燒到埋身，水火不容，咁唯有兵戎相見。但世界好大嘅，好多矛盾，唔係真正生死猶關嘅矛盾。

我認為弱勢係需要幫嘅。我相信呢個世界大部份人都有自己嘅潛能，但得到主流社會所認可嘅人係極少數幸運嘅人。現代社會越講「優化」就只會越會倚重某幾種技能、某幾種身份，而將其他人當成「cost」咁 cut 走。一個極之「有效率」嘅社會，亦都係一個單一嘅社會。呢種社會，其實係系統性咁忽視好多其他未知嘅可能性，亦都係以「優化 (optimization)」之名，壓抑個人選擇，即係壓抑每個人嘅人生意義。

要抗衡單一社會，就係要「本土」思想遍地開花，每個地方、每個社群、以至每個人都有自己嘅「本土」，各自不同，甚至係各自相斥。而我認為呢個現象係好嘢嚟，所以盡可能都應該尊重同接受所有人真心相信嘅立場。難道咁樣仲唔係所謂「大愛」？難道仲會有嘢比呢樣更加包容？當然，如果你嘅本土，係要消費或牲犧我或我身邊嘅人嘅利益去實踐，咁唯有同你死過。呢個世界只有最硬膠嘅論述，先會唔俾人捍衛自己嘅價值同信念。

我相信以上嘅論述，亦係本土，亦係傾向左翼。「左翼」二字太多包伏，如果要好學術咁去講，我呢啲的確唔算係左翼論述。但如果講正式嘅「左翼」，諒左膠嗰啲都唔算。

（原文於 2016 年 1 月發佈，略有修輯）