愛就係選擇

學擇言話齋，定義自己真係好難。

如果我係神，無所不知，無所不能，我自然可以兼愛天下，愛所有世人，並原諒世人一切嘅惡。

但我係凡人。只有凡人，先可以有以上諸多身份。凡人存在於世上，就有自己嘅主觀角度，有自己所喜愛嘅嘢，有自己比較親近嘅人。呢啲係好事嚟，因為人類最寶貴嘅，係自由意志。自由意志，就係一種獨立於客觀世界嘅意識。

有咗自由意志，就有選擇。愛就係選擇。動物同人類之間，我會選擇人類，因為愛；外國人同香港人之間，我會選擇香港人，因為愛；陌生人同家人之間，我會選擇家人，因為愛。

但點解一定要選擇？其實好多時可以 why not both。只不過，當兩者之間有矛盾，我就被迫選擇一個，捨棄其他。例如經典嘅問題「老婆同老母兩個跌落水，救邊個先？」，本身就係你必須二擇其一嘅情況。但一般嚟講，老婆同老母都一齊愛，冇問題嘅 (只要婆媳關係 OK 的話)。所以，只要大家冇衝突，冇矛盾，我其實都可以兼愛世人架。

但矛盾有時係必然嘅。要真真正正做到兼愛，就本身就要自強。佛家有個《割肉餵鷹》嘅故仔：有隻鴿俾鷹追，匿咗入薩波達王胳肋底。薩波達王一向慈悲為懷，就保護鴿，唔俾隻鷹食佢。鷹就話：「你話要救眾生，咁點解要我餓死？」薩波達王無辦法，唯有用刀割自己嘅肉落嚟，代替鴿肉。鷹又話要相等重量嘅肉先收貨。薩波達王將全身嘅肉一塊塊割晒落嚟擺落去秤，唔知點解都冇鴿仔咁重。最後薩波達王成個身跳落去個秤度，捨身成仁。之後好似話咩感動滿天神佛，薩波達王啲肉變返上個身度⋯⋯ 呢啲神話嘢，講故唔好駁故。

呢個故事教訓我哋咩呢？要兼愛唔係唔得，但化解矛盾，就要強大，並且要有犧牲精神。如果你身上冇足夠嘅肉去餵飽隻鷹，你就唯有二擇其一，選擇救鴿定係救鷹。如果你身上唔夠肥肉，救完一隻鴿，人生就架完喇，連自己性命都犧牲埋。所以，強大先可以兼愛，否則你唯有愛自己，愛身邊最重要嘅人，捨棄其他。

唔係我唔想愛其他人，只不過我能力薄弱，必須要捨棄好多嘢。而愛與捨棄之間條界線，就係「自己」條界線。我愛嘅人，就係「自己人」；我關心嘅嘢，就係「自己嘅嘢」。每個人嘅愛同捨棄都唔同，所以對「自己」嘅定義都唔同。有啲人認為天下一家，條界線拉到無雷公咁遠；有啲人認為「大家都係中國人，不用分得那麼細」；有啲人獨愛香港，北抗中共；有啲人連其他香港人都唔愛，只愛理念相近嘅人。其實呢啲都只係大家有唔同嘅取捨，冇咩道理可言，亦冇話邊種取態一定啱或者錯。

《孟子》曰：「窮則獨善其身，達則兼濟天下。」無論你點取捨，須知道強大先可以博愛，博愛先可以強大。兩者應運而生，冇所謂先後。所以窮就會獨善其身，獨善其身就會窮；發達就會兼濟天下，兼濟天下就會發達。

但人類好特別，有自由意志。面對醜惡嘅世界，你可以選擇獨善其身，然後就會窮，因為你捨棄全世界，全世界都捨棄你；反之，如果你愛全世界，就要捨棄自己，去承受呢個世界嘅惡，然後你就可以兼濟天下，就可以通達、強大。自由意志下嘅選擇，係世上最神奇嘅嘢，因為可以打破因果遁環。

所謂「獨善其身」、「兼濟天下」，本身係兩個極端，其實都唔可取。所以香港本土思想，就係以香港為本，要「獨善香港」，免得香港被外力操弄；但同時間，大家亦唔好忘記要「兼濟香港」，唔可以捨棄任何一個香港人 （或者，唔可以捨棄大部份香港人）。香港本土主義，唔可以只講「排外」，亦必須講「兼內」。即係包容，即係體諒，即係愛。

好多人大嗌「我愛香港」，究竟真係愛香港嘅所有，包括好與壞都愛，定係只愛一小撮別有用心嘅香港人？愛香港，唔需要「兼愛天下」，但起碼都要「兼愛香港」吧？如果做唔到，唔緊要，但唔好自稱「香港本土」。如果你只係愛一小撮香港人，而捨棄或仇視其他香港人，咁你最好搵個地方，成立一個小王國，然後喺嗰個小國王，再講你嘅「本土」主義啦。因為唔係我排斥你，而係你排拆香港呀。

我係香港本土左翼。我愛所有香港人。只要你唔好迫我捨棄親友、犧牲親友，我就可以愛你哋，每一個香港人。

（原文於 2016 年 9 月發佈，略有修輯）