傳統往往是創新的包袱？

(作者按：呢道題，係 2016 年 DSE 中文科嘅作文題目之一）

每個人一出世就接觸「傳統」。

阿媽痾咗你出嚟，你聽到阿媽老豆講嘢。你父母嘅語言，係幾百年幾千年嘅文化傳統。見到嘅可能係醫生嘅白袍。係現代醫學嘅傳統。你飲完奶，阿媽幫你掃風，亦都係傳統。

我哋由出世開始，就不斷被灌輸呢啲傳統。有啲傳統比較古舊，例如漢字有起碼二千年歷史。有啲「傳統」比較新，例如你用部智能手機督督督，都係呢十年（或者幾十年）嘅事。

我哋日常生活接觸大部份嘅事物，都係有來歷嘅，有出處，有典故，係基於以前某個典範而形成。我叫呢啲做「傳統」。當然會有人質疑，智能手機督督督咁「新」嘅嘢，真係可以叫「傳統」？ 但傳統係相對嘅。如果有個組織成立十年，佢哋每年清明節都會去一次海洋公園 （講故唔好駁故），咁我哋都可以話呢個就係組織嘅傳統。所謂「傳統」，唔需要下下都攀上三皇五帝秦始皇、中國自古以來XXXX 先至算數。

「傳統」係基於以前嘅典範而形成，相對於「創新」。創新，就係當下畫一條線，將過去同未來分割。以前冇嘅嘢，將來就有。傳說倉頡造字，傳說喬布斯發明手機督督督，都係將一啲以前冇嘅嘢，憑空變出嚟。（傳說嗟，你唔係想同我拗歷史上冇倉頡呢個人呀？）

呢二、三百年以嚟，自從工業革命起，人類社會變化好大。社會不斷創新，每一年都有新發明、新產品，帶動人類明文進步。所以絕大部份現代人認為「創新」係好嘅。的確，如果人類冇創新，我哋而家仲喺山林原野茹毛飲血，連火都唔識整。⋯⋯咪住！如果人類冇傳統，我哋都唔識生火架。如果我唔話你知鑽木可以取火，你係咪咁叻自己可以諗到？如果史前人類冇保留鑽木取火嘅傳統智慧，我哋今日睇怕都係要繼續茹毛飲血。

有啲人會覺得傳統保守嘅勢力，阻礙創新嘅步伐。太多例子，多不勝數。Uber 進軍香港就係一例。我身邊好多 IT 撚，絕大部份人都好同情 Uber。但創新係咪一定好過傳統？ 話說史前人類要生火，除咗鑽木取火之外，仲可以等雷暴來臨嘅時候，走到平原，高舉一條好長嘅樹支，問宙斯借個火嚟用下。呢招夠創新喇掛？點解冇人用？因為鑽木取火有效好多囉。

傳統之所以流傳咁耐，除咗老屎忽唔肯改變之外，仲有個好大嘅因素，就係根本冇人發現更好嘅方法。你要創新，就要解答一個問題：「點解以前啲人諗唔到、做唔到，但偏偏我又做到呢？」如果你答唔到呢個問題，咁好可能你個諗法已經有人諗過、甚至試過，但失敗咗。所以你再去試，好可能都會失敗，除非你能人所不能。呢個就係老屎忽幾千年以嚟不可或缺嘅傳統智慧。

呢幾年嘅科技創新，可能有一半純粹係因為多咗互聯網、多咗手機app，啲人將傳統嘅概念加埋互聯網、加埋手機app，就變成「創新產品」。Uber 係咩嚟？咪就係的士call台加手機app囉。AirBnB 係咩嚟？咪就係民宿加互聯網囉。Instagram 咩嚟？咪就係影相加手機app囉。呢啲「合成」嘅概念對大眾可能好新穎，但第一日有 App Store 出現嘅時候，好多人已經諗緊將傳統嘅概念變成新產品嘅可能性。

所以，好多所謂「創新」其實係基於傳統概念，有典故有淵源。真真正正嘅「創新」（而有用）嘅例子其實唔多，如果要數，我都只係諗到牛頓發明嘅萬有引力。反而用新科技包裝傳統概念嘅就好多，我哋有時亦都稱之為「創新」。如果呢一類嘅「創新」要一竹篙否定晒所有傳統價值，咁就未免有啲唔識得飲水思源喇。何況新嘅嘢未必真係好過舊。

我哋就係唔知新嘢係咪好過舊，所以先要保持開明嘅心態，勇於嘗試，勇於接納。但同時，我想講，潮流嘅嘢，只爭一朝一夕；岸邊嘅岩石不斷被磨蝕，不斷受到潮水衝擊而改變，卻係百年不倒。

（原文於 2016 年 4 月發佈，略有修輯）