一個蘋果 $10，一個橙 $8。應該食蘋果定係橙？

呢個問題係虛無嘅。如果我鍾意食蘋果，我唔會介意俾多兩蚊。如果我嘅家人朋友鍾意食蘋果，我亦都唔會介意俾多兩蚊，買蘋果俾佢哋食。

如果人生裡面冇愛，一切都變得虛無。蘋果又好，橙又好，有咩分別？客觀嚟講係冇分別，食唔食都冇分別，死唔死都冇分別。

人生遇上每一個決擇，如果冇愛，噉任何嘅選項，都唔會有任何差別。或者，我哋最後會選擇一個最少付出嘅選項。

啱啱喺日本九州返嚟，唔知點解，冇特別去搵，但係周圍都係啲俾小朋友玩嘅活動。周圍都有啲公園仔，有啲小型瀡滑梯。去到熊本，巴士站隔籬有個微型嘅農業展覧，除咗俾啲商家認識下有咩產品，仲有啲羊呀、馬(pony)呀、豬呀呢類農場小動物（隻山羊好可愛，係咁叫「咩～」）。我諗佢主要目的係俾啲小朋友接觸下啲小動物啦，唔通俾我呢啲人玩咩。之後嗰日去到門司個鐵道歷史博物館，又有個 300 yen 遊一圈嘅迷你火車路軌俾啲小朋友玩。廿幾年前如果我見到啲咁嘅嘢一定勁想玩。依家見到之後就只會上臉書慨嘆。

我唔係左膠，我係識計利害嘅。如果將公園嘅休憩地方用嚟起樓，可以大賺一筆；喺啲展覧帶啲豬羊小動物，有咩咩咩風險，一陣整親個細路隨時要陪幾百萬；300 yen 一程嘅火車小型遊樂場，喺淡季嘅時候，未必維到皮（例如我去嗰陣，拍晒烏蠅），起咗出嚟可能蝕錢。

呢啲係世界通行嘅道理，無論係倫敦定係紐約定係上海定係東京嘅財經分析員都會同意，其實呢啲 costs 或者 risk 實在不必要。咁，點解只有香港先實踐到咁徹底？

如果你問佢哋，一個蘋果 $10，一個橙 $8，兩個一樣咁多營樣，一樣咁飽，揀邊個好？佢哋會答你：不如食檸檬啦，檸檬仲平，每個盛惠 $5，慳得更多。後生仔，唔好怕酸，當年阿叔咸魚撈飯，邊有咁多生果食？

香港人講咩「理性」、「制度」、「規矩」、「程序」，全部都係托辭。任何一樣嘢，如果本身嘅原因只有「程序上係要咁做」，即係冇任何原因。呢幾年，你有幾可聽過手執權柄嘅人講句「某某事情，對香港人有好處，所以我先咁做」？以前或者仲會有，而家通通係「依法辦事，依既有程序處理」。嗚呀，真係 thank you very much，多 L 謝晒。

愛就係選擇，選擇就係捨棄。而家香港社會（唔只係政府高官），個個擺出一個「理性」姿態，叫你哋食 $5 嘅檸檬。喺佢哋眼中，佢哋愛錢，多過愛香港，所以唯有以規條嘅名義，捨棄香港。

但俾你賺到盡又如何？一個人自己食到幾多個富士蘋果？派埋親友，最多咪幾百個？如果冇濟世為懷之心，就算搶到幾多資源，最後都係化為虛無。有啲人去到呢度就睇唔開，以為世間一切真係全部虛無。但唔係嘅。生命中只要有愛，就會好似一盞明燈，照耀住你樣一個決定。有愛唔一定係「幸福」嘅，因為呢盞燈，係以你嘅生命作為燃料。每一分嘅無償付出，換來嘅就係一分人生嘅意義。

（原文於 2016 年 11 月發佈，略有修輯）