魔法少女許願嘅意義

無聊得滯，走去睇返《魔法少女小圓》動畫。忽然發現，如果用「意義」嘅框架去理解個故事，似乎幾有趣。

個故仔是咁的：有隻叫「QB」嘅外星生物，不斷主動勾搭平凡少女，誘使佢哋成立契約，令佢哋成為魔法少女。契約內容係，QB 可以實現少女任何一個願望，許願之後會變成魔法少女，代價就係佢哋要不斷同邪惡嘅魔女生死搏鬥。故事就係圍繞呢班魔法少女，同埋佢哋嘅願望、佢哋嘅絕望、佢哋戰鬥耗盡力量之後嘅下場。【劇透：順帶一提，魔法少女絕望之後，就會變成邪惡魔女】

任何故事都可以有一千萬種方法演繹，但我只想講「意義」。

究竟有冇任何願望，值得你為之付出生命？

一般人會認為，始作俑者 QB 先至係故事中嘅第一奸角。因為佢就係為咗製造魔女而誘惑少女同佢立契約，所有魔女，都係由魔法少女變成。而且佢刻意隱瞞契約嘅某啲細節。

但我諗諗下，又覺得好似唔應該怪 QB。每個契約都係魔法少女自己「自願」成立嘅，只有誘導，並冇(直接)脅迫。

契約成立，當初許下嗰個願望就已經(或一定會)達成。點解最後魔法少女仲會有失望，仲會有絕望？最後變魔女，變成成悲嘆種籽？

無他，因為人類，講唔出自己真正想要啲乜，更加唔會諗願望嘅代價。其實劇情都有講，點解魔法少女最後會哀失希望，係因為不合常理嘅願望會導致某種扭曲，所以先會引發災難。

又或者，就算講得出真正想要啲乜，咁少女嘅「真正願望」達成之後，世界就會對佢失去意義。如果同 QB 達成契約嗰一刻，少女嘅願望達成，咁其實佢變成魔法少女，繼續生存，又有咩意義？ 又，唔生存，又有咩意義？

一個真真正正對世界再冇任何期望、冇任何期待嘅人，面對呢個毫無意義嘅世界，唔變成悲嘆種籽就奇喇。

如果你有人可以幫你達成任何願望，代價就係生命、代價就係你冇辦法好似正常人咁生活、代價就係你失去人性，你會唔會接受？你會許一個點樣嘅願望？

（原文於 2015 年 10 月發佈，略有修輯）