體驗異國風情，點可以單靠文字報導？

所謂新聞，所謂評論，就係講一啲平時大家日常生活唔多發生嘅嘢，所以先會變城中熱話。

例如，一個國外人，如果想單靠香港嘅新聞去了解香港風俗文化，就會誤以為香港女仔普遍會迫男友跪地掌佢十幾巴；會以誤為香港中學生個個都好似黃之鋒咁嘅款；會誤以為大陸人嚟香港購物有生命危險；會誤以為香港啲水真係會飲死人。

但正正因為呢啲事件係特例，先至有新聞價值嘛。平日陳師奶落街市買餸；林先生八點鐘迫地鐵返工；王伯賽馬日喺馬會票站出面刨馬經；宅男週末拖住條女行信和 — — 呢啲日日發生嘅事，因為係本地人嘅 common knowledge，根本冇人會走去大特寫。

同理，我哋如果單靠外國新聞去理解外國，都會犯呢種謬誤。唔係話完全理解唔到，但你只會見到異象，而睇唔到個背景，睇唔到個 context，睇唔到啲日常。例如，你只會知道美國總統候選人講過咩柒嘢，但你未必會知道十二月初超市啲火雞好很平。

誤解咗外國社會，本身唔係問題。但香港人最鍾意就係崇洋媚外，照搬外國制度，以外國標準做自己標準。尤其係倫理價值嘅嘢。例如香港絕大部份人口都係「華裔」，其他國家嘅「少數」族群都佔總人口幾成咁多，係咪會有唔同嘅 social dynamics？又例如「外國」講種族平等，講男女平等，同樣論述係咪適合香港呢？香港兩性角色同關係，同其他地方有幾相似，係咪可以將一套基於某外國文化背景嘅論述，照套用返嚟香港？（假設香港男人發起「男權運動」控訴外母唔夾雞脾，控訴擺酒買樓禮金動輒百幾萬，呢啲理論喺香港可能好適用，但如果有外國人拎嚟證明全世界男人都受到相同壓迫，就笑死人啦。）

同樣地，香港人口口聲聲講「民主」，但民主唔只係制度，而係牽連一大堆深入民心嘅文化價值觀。華人社會講究「尊重長輩」，同外國所謂嘅「民主價值」有冇衝突？你可以望住香港民主黨咁嘅款，然後話冇。得，不過個結果咪就係「民主黨式民主」囉。

所以，好多時，本地化嘅論述，好重要。唔係話將啲差唔多嘅嘢轉咗用中文講一次，夾硬套用喺香港，就叫做咗論述。咁同啲軟件有咗簡體中文字就當做完 localization 有咩分別？

所以，我近年好有意識咁避免評論外國嘢。我知自己鳩噏成性，所以更加要自我警惕。因為真係一講就錯。甚至，我有時會覺得，就算你熟知外國情況都好，刻意避談，等香港人可以從自己承傳嘅文化當中，演化出一套適合現代嘅價值同制度，總好過下下都空降一啲據稱喺外國行得好掂嘅唔知乜撚。

我唔係話要閉門造車。外國嘅嘢，一樣要知。不過，知道之後，唔好當係有咩大不了，唔好以為外國嘅月亮一定更圓，更加唔好以為自己好理解人哋個情況。我只不過係講緊，去外國取完西經之後，都要在地實踐，先會知道套嘢通唔通。如果唔通，好可能係套理論需要調整，而唔係倒過來控訴香港人「違反XXX倫理」、「違反YYY標準」。人民永遠是對的，好似係。

（原文於 2015 年 10 月發佈，略有修輯）