用中國人血肉築成嘅新長城

是咁的。中國大陸近年發生咁多人禍，慘係慘，不過其實外界真係冇必要用所謂「普世」價值去批判佢哋做嘅嘢。

近年二三十年中國流行嘅「新中國價值」，發展大過天，要崛起做世界經濟強國，超英趕美，保八保七。喺呢啲大前提大宏願之下，西方流行嘅咩民主人權價值，變得次要，甚至係可有可無。呢個唔係單純大陸政府一手包辨嘅。事實上一個冇民主制度嘅大國，反而要用其他方法令到民眾滿足於現有政府，包括製造一個大家都認同嘅共同宏願。以前係共產主義，而家就係經濟發展。而事實上，從香港人近年同大陸人嘅「交流」得知，大陸人普遍認同國家高速經濟發展呢條路線，並且以此自豪。

中國呢十幾年經濟迅速發展，中國人民嘅克苦耐勞係一個重要因素；但中國貨風靡全世界，靠嘅唔只係量，而係「質」。中國貨出名量大、低質、廉價，主要係以價錢取勝。

低價產品點嚟？未必係中國人做事特別效率高，而係國人肯作出西方先進國家唔願意做嘅取捨。呢種取捨，大致上係有意識咁進行嘅。我上面都講過，近年中國人傾向崇尚經濟發展，民主人權等等放次要，所以工人嘅安全、環境污染等等問題，亦要放在經濟發展之後。我相信大陸任何明眼人都知道點解中國貨（曾經）咁平，只不過講出嚟唔多好聽咁解。法官大人，要安全要質素，定係要 GDP 要錢呀？身體係好誠實嘅。喺大陸，只要有錢，冇人認真同你講安全講質素。

喺咁樣嘅環境之下，大陸各式各樣匪夷所思嘅人禍，相繼發生。呢啲人禍係「發展大過天」嘅環境下必然發生嘅。

我不斷講「愛就係選擇，選擇就係犧牲」，中國人民集體選擇經濟發展，同時犧牲個人安危，明知對人身安危造成影響，都往而無悔，正正係一種「愛國」嘅表現。某程度上，人禍嘅受害者，雖然唔係「自願」被炸死被壓死，但客觀嚟講亦都係為國家發展而犧牲嘅偉大烈士，理應受到國家級表揚。士兵被迫為國家披甲打仗陣亡，如果表現英勇，一樣都會受到表揚。性質上兩者相差唔幾。

當「發展大過天」已經成為全中國人民嘅共識，外人揸住「普世價值」去譴責中國任何個人或任何組織（包括政府或中共）都唔恰當。

外人嘅譴責，係廉價嘅。因為唔係佢哋作出取捨。係人都知民主人權乜乜乜係有好過冇，但如果要同 GDP 做取捨，你會點揀？

作為外人（包括喺大陸體制以外嘅香港人），如果真係睇唔過眼要譴責呢種「草菅人命」嘅國策，而又唔想咁廉價去譴責，大可以選擇唔買中國貨，唔買任何靠草菅人命廉價製造嘅產品。呢種選擇，當然好貴。有人會話：「好難啊！周街都係強國貨，點罷賣呀？」咁呢，常言道「世上無難事，只怕有心人」。又唔係叫你飛上月球，總會做到嘅。否則，你只不過係享受中國貨嘅廉價嘅同時，又譴責呢啲貨物之所以廉價嘅主因。

至於我，我梗係做唔到罷買中國貨，亦冇乜興趣做。國家推行嘅政策，令到我可以買平價大陸貨，慳返唔少，有望可以儲錢供養李嘉誠李兆基，支持香港本土經濟，實踐本土派精神。所以，我點解要因為幾單人禍譴責大陸人？？？？有人肯為國捐軀，求仁得仁，我只會向犧牲嘅烈士致敬。

至於有人驚唔作狀譴責，呢啲「大陸價值」會蔓延到香港。我又唔驚喎。香港人咁驚死，只要透過紀念為GDP犧牲嘅烈士，大家就會明白大陸嘅疑似 7% GDP 增長係要死人嘅，咁就會乖乖接受現況，唔會想發展架喇。

又，如果大家真係唔驚死，咁咪有愛，有選擇，有犧牲，有意義囉。 Who am I to judge?

（原文於 2015 年 12 月發佈，略有修輯）