正念、執念、妄念、FF念

有啲嘢，你諗住係咁，點知事實唔係咁，你會失望，失落，甚至痛苦。所以，《莊子》教你「無所待」，佛家教你放低執念，應用哲學家教你咪發明咁多離地理論。

又，有啲野，如果你諗都唔諗，就唔會發生。你想件事發生，總要諗下佢，咁先至會諗到點樣令佢變成真。人類唔係話「有光」就有光，而係你動念「有光」，然後走去撳掣開燈。如果你連「有光」都唔諗下，咁自然唔會走去撳掣，咁就唯有眼光光等到天光先有光喇。

當然啦，根據現代科學，齋用「念力」係冇得改變任何嘢 (好似係)。任何人想要改變世界，除咗動念，亦都需要作出最起碼嘅行動，例如郁下手指、撳下掣之類。所以，基本上，只要你動念，而動念導致某啲行動，咁就可以改變到世界。但係你作為一個人，唔係萬能，人類總有極限。

例如，可能你想三小時內跑完個馬拉松。咁你靠「意志」，加上適當嘅訓練，或者可以做到；但如果你想要一小時內跑完個馬拉松？「傻的嗎」。強烈嘅意志，可以令人成功完成一件事，亦都可以令人發狂。試想像下，同樣係「我要 X 小時內跑完馬拉松」，如果 X=3，咁一個跑手會因為強烈嘅意志而成功；但如果 X=1，咁意志越強，就只會令人越痴線。

我講嗰種痴線，係求之不得，繼而心理唔平衡嗰種痴線。我諗應該唔會有人會因為一小時內完成唔到全馬而抓狂，但好多人會為啲差唔多咁低能嘅嘢而唔開心。例如，有人會好努力溫書，然後考試成績唔理想，就唔開心；例如，有人會好想追到某個女仔，最後食檸檬，就唔開心；例如，有人會好努力寫文章希望有人欣賞，點知冇人理，就唔開心；例如，有人會希望自己個仔女做到醫生律師，自細幫佢諗好晒鋪好晒路，點知佢話想做畫家，就唔開心；例如，有人期待男朋友送佢 “flower”，點知送咗 “flour”，就唔開心…… 嗚呀其實太多例子，舉唔晒，暫時係咁先。

上述所有例子都有個共通點，就係期待嘅嘢冇發生到，所以唔開心。俗語有云：「冇希望就唔會有失望」。如果想避免呢種唔開心，最好嘅方法當然係唔好對世界有任何期望~~ :) 之但係，即刻會有人反駁：「咁你冇期望，自己點會進步？世界點會進步？如果下下都將自己嘅標準降到好低，咁做人又有咩意義？」係架，所以唔可以所有嘢都冇期望。呢篇文一開始就話：「有啲野，如果你諗都唔諗，就唔會發生。」

所以，有時，我哋係需要有諗法，有期待，有寄望。但係，有期望即係有失望，咁點算？有啲人就會話：「人生就係咁架喇~」 (sigh, life…) 嗯，人生就係咁架喇~~

【以上係引言】

— — — — — — —

【以下係正文】

當然我唔會寫篇廢話齋講「人生就係咁」啦。作為一個唔識哲學嘅應用哲學家，我要講廢話：「只要你期望嘅嘢最後成真，就唔會失望。」重要嘅嘢重覆多次：「只要你期望嘅嘢最後成真，就唔會失望。」

咁點先可以確保期望嘅嘢會成真？當然就係：「唔好期望啲唔會發生嘅嘢」。再重覆：「唔好期望啲唔會發生嘅嘢」。所以，唔想失望就要未卜先知！未卜先知！學識點樣預測未來，就知道咩唔會發生，然後避免期望嗰啲嘢！ 不過，做先知唔好玩架。我夠知太陽聽朝會由東邊升起，但如果我去期望呢樣嘢，似乎有少少on99。通常，人類期望嘅嘢，都係要靠自己付出。如果一件事自己冇份參與，就會少咗一份關切。一樣嘢如果係靠自己努力取得，嗰份滿足感通常比較大。(所以，就算係賭大細，明明你嗌「大！大！大！大！大！」都唔會影響結果，但嗌下好似開心啲，因為你會有種錯覺，覺得嗌咗好似會影響結果。)

所以，我會期望自己考試考得好，我會期望追到某個女仔，我會期望升職加人工，我會期望出篇文有幾萬個like……[1]，而呢啲嘢，係我或多或少「有能力改變現實」嘅事：我知道，我唔溫書，就考唔好；我唔用心追個女仔，就未必追到；我唔努力工作，就唔會升職，我唔炒花生寫潮文，就冇幾萬個like……[2]

如果我有所期待嘅嘢，好多都係自己可以影響結果，咁要避免失望，就唔需要做「全知」嘅先知。我只需要「自知」。究竟我努力溫書，係咪真係可以考得好個試？究竟我用心追女仔，係咪可以贏得美人芳心？究竟我努力工作，係咪可以得到上司賞識？究竟我寫潮文，係咪真係呃得到like？只要識得答呢啲問題，就唔怕失望啦，係咪？

所以，只要人有自知之明，就可以改變世界之餘，唔會因為期望落差而沮喪。其實，只要人自知，就即係知天命，即係有預測未來嘅能力。你諗下，如果你可以答到所有關於你自己未來嘅嘢，咁同可以預測未來有咩分別？所以，人類冇可能 100% 「自知」。

冇 100%，就唯有估。無論你係「理性估」或者係「鳩估」，都唔會準確。所以，我上面嘅「正文」講「自知」其實全部都係(優質嘅?)哲學廢話。真正嘅結論係：「你既然唔識預測未來，就冇計架喇~~ 人生就係有期望、有失望~~ 係咁架喇~~」。

【以上係正文】

— — — — — — —

【以下係真理】

應用哲學家唔怕鳩估、唔怕錯，最緊要錯咗就認。所以，面對住一個唔符合主觀期望嘅事實，越快承認錯誤，越快糾正錯誤，就可以越快從失落中回復過來。只要緊貼現實，唔妄想，唔作無謂嘅猜想，任何期望嘅落差，都會迅速變返零。[3]

當然，有意義嘅人生，唔係純粹觀察現實架嘛。可能你對某樣嘢好有熱情，不惜窮一生努力去追求、去悍衛，咁無論現實係點，你都願意搏盡求變，爭取任何改變世界嘅可能。如果真係咁，你又何必介意咩「期望落差導致你唔開心」呢？反正一開始就成條命豁咗出去，係咪咁話。意義，就係選擇，即係捨棄其他。 反之，如果你覺得人生冇咩嘢值得你去燃燒生命，咁就……恭喜你！你完全符合「無所待」嘅條件，心如明鏡，無欲無求，咁只要學識應用哲學嘅「快速認錯大法」[4]，就會好快成佛 (好似係)。

簡單啲講，就係一句「你願唔願意？」 如果願意，就搏盡無悔。如果唔願意…… 屌，咁你咪撚FF啦！

我忽然覺得，人生嘅哲學大道理，其實都好簡單。 :)

— — —