想學矽谷？都要天時地利人和

見到有人喺臉書呻話台灣有班老屎忽，唔帶挈後輩，唔識又指指點點，好羨慕矽谷有班 angel investor 會將佢哋自己嘅創業經驗傳承俾下一代云云。我見都有唔少香港嘅朋友分享，相信都係深有同感。

但所謂「矽谷」嘅運作模式，係咪真係純粹因為班老屎忽阻住晒呢？我認為，要先了解所謂「矽谷」嘅模式，同傳統產業嘅分別。

傳統產業，講究嘅係企業管理：控制成本、將現有制度系統化、減低企業風險、謀求（相對）穩定回報，等等。

矽谷型科技startup，講究嘅係用新科技「打亂」(disrupt?)傳統生意模式，用呢個優勢將 ＊全世界＊ 某個行業嘅生意搶返嚟。例如 Uber 就係搶緊全世界嘅的士服務， AirBNB 就係搶緊酒店(或者起碼 motel 啦)嘅生意 1。呢類 startup 一係就天價 exit，一係就 crash and burn，同「一分耕耘一分收獲」嘅傳統思想好大出入。

講得好聽就係創業，講得衰啲就係好似用半副身家買六合彩咁樣豪賭 （唯一分別就係「獎金」比六合彩更多，所以 expected gain 可能係 positive）。你要有咁嘅野心，又唔怕失敗，先玩得呢個遊戲。唔好話啲老屎忽吖，其實喺香港就算係年輕一輩本身都會有種朋輩壓力，你如果話「我嘅夢想係賺十億！」肯定會俾人當係怪人，會仲慘過被謠傳月入六位數。根本當你個社會槍打出頭鳥，人哋就唔會寄望你班人可以搞得出一個影響全世界嘅 startup。

當然香港仲有好多文化上嘅弱點啦。本地市場太細，如果要搞得大就唯有(先)打外國市場。咁樣做係有難度嘅，尤其係近年啲科技 startup 好講究可以短時間內吸引一大班用家 (going viral)。如果你唔熟人哋文化，唔識呃 click，要花時間去試探市場，咁就會比較蝕底。

至於香港係咪冇(好嘅) angel investor 呢？我唔知 （冇搞過 startup）。就算有，見住啲香港公司都未必好有胃口。（不過唔好唔記得李嘉誠擁有 0.8% FB）

所以我會話：產業唔同。雖然大家都係搞電腦嘢，但喺生意角度，矽谷型公司同傳統產業係完全唔同嘅嘢。唔係話「人哋外國點點點」你就可以照抄。起碼老屎忽間公司仲未執笠，佢如果身痕轉型，只會凶多吉少。大佬你諗下喎，當你幾十歲人有老婆仔女要儲錢退休，唔係要佢拎養老金出嚟學啲後生仔咁樣搵命搏呀？坊間話啲 startup 失敗率係大約八成九成，係你都唔搏啦。真係搵身家買六合彩架喎。

啲 angel investor、venture capital 點解肯搏？因為佢哋係分散投資，同時間投資幾十間公司，唔洗個個成功，只要一個掂就得 2。咁咪要有幾十間可能搵到大錢嘅公司囉。除咗美國少數地方有咁嘅「生態環境」(ecosystem)，邊度仲會有？如果你想徒手喺本地搞一套咁嘅嘢，有冇成功嘅客觀條件？

所以話，唔係人哋嘅嘢唔值得學，不過真真正正學識咗佢哋嗰套之後，要明白好多嘢都睇「天時地利人和」。睇返現實，都只可以喟然長嘆而已。

至於大家咁唔好彩生而為香港人，可以點生存？呢方面我冇乜經驗 3。理論上就係要靠「本土派理論」，做細唔做大、唔好心頭太高，要用心做好一樣「細」嘅事。詳情可以參閱雞絲陳篇文：《論小店優勢 — — 有自主先至有人情》 。如果你睇唔出嗰篇文同「小公司小市場點樣生存」有咩關係⋯⋯咁冇嘢喇，大家繼續打工啦。

—