任何「決定」同「承諾」都係預言

任何「決定」同「承諾」都係預言。（如果你相信自由意志的話，咁就係自我實現嗰種預言。）

例如：「我決定今晚去食譚仔」。呢個係預言。

承諾亦類同。

例如：「我約你今晚七點食譚仔」。呢個都係預言。

成長過程中，我哋知道自己冇預知未來嘅能力，就知道主觀願望未必會成真，知道許過嘅承諾未必會兌現，知道原來人類嘅意志係如此渺小，渺少到連食個譚仔都有機會食唔成 — — 可能有人急病入廠，可能間舖突然執笠，可能打風落雨，可能香港俾殞石擊中…… 咩都有可能，只睇機率有幾高。所以，某程度上，我講嘅只係人類面對自然世界時嘅「謙卑」。

所以，如果你「相信承諾」，即係相信許諾者有先知嘅能力，可以預知未來，包括預知未來嘅自己。有預知能力，先可以作出必然兌然嘅承諾。

呢個結論，聽落係違反常識，好多「相信承諾」嘅人，到死一刻，都唔知自己原來相信緊一個童話故事。《睡公主》入面嘅女魔王詛咒小公主十六歲會俾紡綞殺死，連小學雞都唔相信會喺現實世界發生，但偏偏呢種預言（aka. 「承諾」）每日都發生緊。（例如婚姻註冊處嗰度。）

陳奕迅最近首《無條件》嘅歌詞（袁兩半填詞），我予以甚高評價，正正就係因為佢將愛情描述得好「在地」。冇虛幻嘅承諾，冇完美嘅伴侶……

只有無條件，甚至係無甚原因嘅愛。

期待美沒完愛沒完 放開不必打算的打算
作一些可以約定的約定 就抱緊以後每一天
其實你定然都發現 我有很多未達完美事情
我只懂得 再努力每天

識得謙遜，就有自知。有自知，就識得分輕重。有輕重，就有取捨，就有愛。任何本土理論，都離唔開「小愛」。所謂「弱水三千，我只取一瓢」，就係咁解。

（原文於 2015 年 10 月發佈，略有修輯）