【本土理論】點解要花二百蚊食個雞煲？

今日食雞煲同朋友吹水，有人問起，「覺醒」咗嘅香港人係咪一定會絕望，睇清香港社會現實嘅人係咪一定會(好想)移民，係咪「唔覺醒就係豬，覺醒就會唔想理」。聽到咁嘅疑問，我驚覺原來我平時寫嘢寫得太玄，畫腸不足。而家惡補返，希望今次畫條腸畫得似樣少少。

我嘅「本土理論」嘅宗旨就係：有愛就會付出，有愛就有犧牲。因為，愛就係選擇，選擇就係捨棄其他。

反正人生最後都係死，你惜金惜命，最後為乜？死咗之後，「萬般帶不走」，連業都未必會隨身。

所以人生在世，如果有想做嘅事，有願意為之付出嘅事，去馬啦，有咩好計較喎。難道你慳埋慳埋，日後真係有地方使？難道你掛上虛偽嘅臉孔笑臉迎人，唔敢講真心話，日後就一定會幸福？

有啲人每個月出糧就覺得要使晒啲錢先安樂，但偏偏又唔覺得有條命就要好好「使用」呢條命。我唔係話將生命燃燒凈盡先至算不枉此生，而係話，如果有樣嘢值得你付出，咁你唔應該學人去「理性計較」所謂嘅「得失」。與其長命百歲而鬱鬱寡歡，不如做啲風險大啲但做咗唔會後悔嘅事。

就正如食個麻辣雞煲差唔多每人二百蚊埋單，唔平架，係「唔抵」架，咁不如去麥記咬個包？講「營養」或「飽肚」嘅效率，肯定係去麥記食 $22 超值套餐比較高。 「點解唔食 $22 超值套餐，而要特登走去食雞煲？」

想食囉。

「每人埋單二百蚊喎！」

想食囉。

本土理論，就係去食雞煲咁簡單之嘛。

（原文於 2015 年 10 月發佈，略有修輯）