【本土理論】本土派必須以英文救港

一個社會嘅文化傳承，某程度上都同語言有關。我呢一年我花咗唔少時間同精力幫手推廣粵語。但其實我亦好想做多啲英文嘅推廣。不過冇乜時間搞，所以唯有事但寫篇文解釋一下就算，希望大家得閒諗諗佢。其實英文對香港人文化價值嘅傳承都好重要，甚至比粵語更重要，因為好多關於香港嘅文化、文獻、價值，都源於英文世界。

坊間一直有曰「共產黨中文」污染香港本土文化云云，有人因此就將好多中文詞彙分類成「共式中文」而禁用，引起唔少爭拗。好多功力不足嘅人，更加會誤將傳統中文詞語當成「共式中文」，再搞落去，只怕會開始有「獵巫」之勢。其實香港中文（尤其書面語）同「共式中文」系出同源，呢幾十年來又不斷有交接，兩者始終糾纏不清，好難區分得乾淨，亦好多灰色地帶。

所以，如果大家真係因為「政治」原因而抗拒大陸流通嘅中文，咁大家好應該多啲用英文，咁就可以清楚割席。中文同英文兩隻語言大纜都扯唔埋，唔會「唔覺意」、「陰啲陰啲」咁俾所謂「共式思維」入侵，絕對係區隔中港嘅良好工具。

香港回歸之後，越嚟越「中文化」，香港人亦越嚟越少用英文。就算係政府出嘅官方新聞，英文版都頹廢啲。大家平日嘅書信、通訊、報導、文章，都係用中文居多，英文就越嚟越少。咁樣長久落去，大家勾結外國勢力就會比較難，因為啲鬼佬都唔知你地發生緊乜事。另外，中共要「滲透」香港，亦都比較容易。起碼，一般嘅大陸五毛，未必識英文。佢哋要喺香港人嘅英文討論加把口，好易露底。如果中共要請一班識英文嘅打手，就要出更高價錢，亦變相增加維穩成本。

另外，如果英文真係可以喺香港更加流行，中共要玩「語言偽術」，亦都相對比較難。好多中文政治詞彙，係香港或中國獨有嘅。所以啲高官點講，點樣玩弄文字，都係自說自話，點講都得。就算最後譯返做英文，都只係「翻譯」，翻譯得唔好，你都唔怪得啲玩弄中文嘅官員架。不過，如果香港人以英文為本，咁啲官要玩弄文字，就要面對廣大嘅英文世界。佢哋要偷雞搬龍門，就冇咁易喇。

以上嘅考慮，大部份部都係照搬本土撚捍衛「華夏傳統中文」嘅政治理據。但係點解冇人提倡多啲用英文？我唯有理解做「決心不足」。 如果語言嘅選擇需要考慮政治因素，英文就係香港人首選。可惜好多本土撚死都要擁抱一個同「共式中文」有九成相似嘅語言，但口口聲聲話要中港區隔。喂，其實係咪有啲on9呢？

我時不時會俾人指點某個詞語係「共式中文」，真係好無奈。例如有一次有人留語話「臉書」係「大陸用語」，話應該寫做「面書」…… 我心諗jm9……？！

而家香港某啲所謂「本土派」人士，寫粵語又話低俗，寫英文又話唔識睇，係都要寫啲同「共式中文」九成相似嘅「正統中文」去做「中港區隔」。我心諗屌你啦，快啲同大陸融融洽洽咪算囉，搞乜春本土主義唧？（頭盔：我唔係話寫書面語中文唔好，不過作為香港人，抗拒粵語同英文，客觀效果根本就係擘大手歡迎大陸文化南下融合…）

最後，實有人會質疑我點解呢篇文唔係用英文寫。Well, 如果我用英文寫，仲會有人睇架咩？__，講呢啲！你哋自己反省下先啦~~

（原文於 2015 年 8月發佈，略有修輯）