「客觀」只係溝通工具

從前，有一個好怕凍嘅人叫做阿高。阿高有個好朋友阿登，佢就最怕熱。

喺一個秋天嘅夜晚，一陣寒風來襲，阿高凍醒咗。第二朝佢同阿登講：「尋晚好凍喎！」，阿登話：「唔係丫，我唔記得開巴蕉扇，瞓到出晒汗……」 阿高：「………」到咗中午，阿登大汗淋漓，佢同阿高講：「喂，你唔熱咩？」 阿高就話喇：「其實我有啲凍……我件褸擺咗喺邊？」

有一日，佢哋條村終於籌夠錢請個氣象學家嚟預告天氣。第一日，佢預告夜晚會有幾陣「涼風」，叫大家著夠衫瞓覺。結果，怕熱嘅阿登熱死咗，第二朝走去同氣象學家投訴。氣象學家吸取教訓，第二日就話今晚會好暖。結果，阿高凍病咗，又投訴氣象學家。

氣象學家發現咁落去唔對路，就叫晒成村人去佢辦公室，教佢地咩叫「攝氏溫度」。自此之後，當氣象學家預告夜晚係「攝氏四度」，阿高就會蓋綿被瞓覺，而阿登就將風扇校到最大先瞓。Yeah，皆大歡喜。(按：佢哋條村冇發明八號風球)

自然哲學家[1]聽完呢個故事，捋鬚微笑，心情靚靚，就講咗以下呢番說話：其實「凍」同「熱」只係主觀嘅感覺，唔可以作準；我哋要客觀咁觀察世界，用科學嘅方法量度事物，先至可以探知「真理」。

應用哲學家就話：溫度只係溝通工具，並唔係「真理」。有人覺得攝氏四度係熱，有人覺得四度係凍，全部都係「真」，所以各人有各自嘅「真理」。事實上「攝氏四度」並唔存在，存在嘅只係氣象學家同村民嘅溝通，令到大家天氣凍定熱。「攝氏四度」唔係「真理」，但非常「有用」，所以我哋會用呢個標準去溝通，去做科學觀察，去設計科學模型。

我哋又可以話，因為「客觀標準」只有一個，係「converge」嘅，所以如果要大家認同一個「真理」，就唯有用「客觀標準」去說服其他人。因為，有人話「真理得一個」嘛。如果真理只有一個，而又要大家都認同呢個真理，咁除咗用「客觀標準」，仲有咩方法唧？

事實上，只要俾人稱之為「哲學家」嘅人，通常都有唔少人認同佢嘅理論，先可以闖出名堂。所以佢嘅理論必定好客觀，同普遍。所以，越出名嘅哲學家，越係「客觀」。哲學家都好民主架~ (好似係

至於咩係「真」？真正嘅哲學家會話，所有嘢都係「真」，所有嘢都唔係「真」。

— -

[1] 以前啲科學家(如牛頓之輩)係叫「自然哲學家」嘅

（原文於 2015 年 7 月發佈，略有修輯）