我愛上咗一碟叉燒飯

是咁的。今日，我走咗入間燒味舖。坐低。同伙記講：「唔該愛碟叉燒飯吖！」

廣東話呢個「愛」字 ，除咗可以同父母妻兒講，仲可以同一碟叉燒飯講。我同呢碟叉燒飯冇咩特別感情，更加唔會照顧佢一生一世。我……只不過想食咗佢啫。所以，呢度嘅「愛」，係「想要」、「選擇」嘅意思。

就係咁，我愛咗一碟叉燒飯。

叉燒飯未必係世界上最好嘅食物。啲人話，咩溏心鮑魚呀、黑松露菌呀、德國洋腸呀、神戶和牛呀，全部都好食過叉燒飯。又有人話，叉燒飯冇纖維素，又冇維他命 C，唔健康呀！不如……食個橙？ 我呸！ 如果我食飯都要根據一套客觀指引，例如食物嘅價錢、OpenRice like數、營養師建議、食家推介、乜叉乜叉，客觀理性統計完一輪之後就得出結論，咁我仲「選擇」乜嘢？我仲「愛」乜嘢？根本就冇得揀！

所以，我「揀」得叉燒飯，當然知道佢有諸多缺點、當然知道世界上有更好嘅選擇，但我依然揀佢。諗返轉頭，我都真係好愛呢碟叉燒飯架……雖然我食咗佢落肚。

其實，呢個世界每一個人嘅「自由選擇」，都係咁糾結嘅一回事，否則就唔係「選擇」。我明明可以食到各式各樣嘅美食，但係偏偏選擇叉燒飯，所以就「有得揀」。我一路食叉燒飯，一路撳手機上 facebook，見到某女神出 post 呻「冇人追」，講到自己好慘慘。實情係，女神有三十幾個追求者、一百幾十隻兵，只不過冇一個睇得上眼，所以就「冇得揀」喇。因為，佢唔愛。因為，佢覺得個個都唔夠好。因為，佢想要「最好」。最好，”THE BEST”，話明係「最」，永遠只得一個。永遠冇得揀。

當你不斷追尋世界之最，當你見到更好就改變初衷，就會失去「選擇」嘅能力，就會失去「愛」嘅能力。大家耳熟能詳嘅《結婚誓詞》係咁講嘅：「無論是順境或是逆境，富有或貧窮，健康或疾病，我將永遠愛你」。如果有人好「理性」咁將佢改成「只要你keep住係最好，我就會繼續愛你」 就會變得不倫不類。

叉燒飯唔係 THE BEST。所以，我可以用自由意志，選擇愛叉燒飯。就算嚿叉燒有幾多豬油，我都唔後悔。

同樣地，香港呢個城市，未必是 THE BEST。所以，我可以用自由意志，選擇愛香港。我愛香港，唔係因為佢最好。我愛香港，係因為就算 this city is dying，我都唔會放棄佢。

凡所謂「愛」，只不過係唔理智嘅「選擇」。有得選擇，就有自由意志。有自由意志，先至有身份，先至有「自我身份認同」。香港人嘅身份認同，就同我愛叉燒飯，一樣道理。

（原文於 2014 年 6月發佈，略有修輯）